2719/2022-2023
Aizawl, 18th November, 2022 : Vawiin khan Govt. Middle School, Samlukhai in kum 50 an tlin (Golden Jubilee) khawtlang huapa ruai nen lawmna an buatsaih chu Human Resources Development (HRD) Board Vice Chairman Pu L.Thangmawia chuan khuallian niin a hmanpui.

Golden Jubilee lawmna inkhawmah khuallian Pu Thangmawia chuan Govt M/S, Samlukhai in a kum 50-na, Golden Jubilee a thleng chu thinlung taka a lawmpui thu a sawi a. Zirna hi mihring te tana thil pawimawh ber te zinga mi a ni a, Sap Missionary te pawhin chanchin tha kan rama an rawn hril rual khan zirna bul an rawn tan nghal a, hei hian zirna pawimawh zia a tilang a ni a ti.

Hripui leng karah Mizoram Sawrkar pawhin Zirna lamah nasa takin tan a la a, zirtirtu, zirlaite leh nu leh pate nena tha taka kan thawhhona azarah hripui len vanglai tak pawhin a theih ang angin zirlaite zirna a bahlah loh nan online leh remchang apiang dapin zirna kalpui reng a ni a ti.

School Education Minister Pu Lalchhandama Ralte kaihhruaina hnuaiah zirna siam tha tura theih tawp chhuah mek a ni a. Kum 2018 December thlaa sawrkar thar a lo pian hnu khan Zirtirtu 958(P/S - 436, M/S - 415, H/S - 89, HSS-18) an chawl (retired) tawh a. Chutih rualin Zirtirtu Regular 152(P/S - 94, M/S - 58) MPSC kaltlanga lak an ni a, MR zirtirtu 880 (P/S - 817, M/S - 63) lak fel a ni bawk a. Thawktu lak belh hripui leng avanga sawrkarin a tih tawp lailawk lai pawhin Sikul zirtirtu indaih lo zualah SEDP Teacher 771 zet kum khat chhung atan lak an ni a, hei hian zirtirtu thahnemngaiten an hlawh thawhkhawma an rawih te, Khawtlangin sum senga zirtirtu a rawih ngai tur tam tak a chhawk zangkhai hle a ni a ti a. Zirtirtu Headmaster a kaisang 548 (P/S -224, M/S - 170, H/S - 140, HSS - 14) lai an awm hman bawk a ni. Tunah hian High School-a Science leh Mathematics zirlaibu te English leh Mizo tawnga tihchhuah turin MBSE in chak takin hma a la mek bawk a ni. Hripui leng lo phei se chuan Zoram Education hian Zoram mipuite nena inpawh taka kan thawhhona avangin tun term chhung hian hmel thar a hmu ngei ang a ti.

Jubilee lawmna inkhawm hi Pu Lalrempara, Organising Commitee Vice Chairman in a kaihruai a, Pi K.Varparhin hunserh a hmang a, he sikul chhuak mi hlawhtling ten thusawina hun hmangin tlai lamah ruai khawtlangin an theh nghal bawk.