2721/2022-2023

Aizawl, dated 17th November 2022: Nimin 16th November 2022 (Nilaini) chawhnu Dar 2:30 pm khan Mizoram Sawrkar hnuaia State Broadband Committee (SBC) chu a tum 4-na atan Chairman Pi Renu Sharma, IAS, Chief Secretary, Govt. of Mizoram kaihhruaina hnuaiah, MINECO, Aizawl-a Chief Secretary Conference Room-ah an thukhawm. State Broadband Committee thutkhawm tum 4-na ah hian Mizoram Sawrkar hnuaia Department hrang hrang EF&CC, PWD, P&E, UD&PA, LAD, leh Planning Department aiawh te bakah Mizoram pawn atangin Department of Telecom, Govt. of India, BSNL, BBNL, COAI leh TAIPA/DIPA aiawh Official te an tel bawk a ni.

He meeting-ah hian Mizoram thingtlang khuaa mobile connectivity tha zawk kan neih theih nana 4G Saturation Project hmalak mek dan sawi ho a ni a, he project hmang hian Mobile signal awm lohna khua zawng zawngah 4G Connectivity pek vek an nih theih nan hma lak a ni. Mobile signal that lohna khua 61 la awm zinga 51 ah te tunah hian Mobile Connectivity tha tak an neih theihna turin hma lak mek a ni.

State Broadband Committee hian Mizoram chhunga 5G kan hman vek theihna tur 5G Rollout atana hmalakna an thlir ho bawk a, 5G State Rollout Committee chu Chief Secretary kaihhruaina hnuaiah din tawh niin theihtawp chhuaha hma lak nghal a ni a, 5G Rollout atan hian Street furniture hrang hrang te hman tangkai dan turte sawiho a ni a, hemi atan hian ICT Department, UD&PA, P&E, PWD, AMC leh a kaihhnawih Department ten Dan leh Hrai an neihsa thenkhat te siamrem tura hma lak tum a ni bawk.

State Broadband Committee hian Mizorama internet connectivity tha zawk kan neih theihna turin theihtawp chhuahin hma a la mek a, a tul ang anga kaihhnawih department leh organization te pawh theihtawp chhuah turin a ngen an ni.

Pu Lalramsanga Sailo, ICT Secretary in Mizoram chhung connectivity lama kan dinhmun powerpoint presentation a pe a, Pu Vishwa Mohan, DDG, Department of Telecom, Govt of India pawhin presentation pein Department of Telecom hmalakna te a tarlang bawk.