2722/2022-2023

Champhai, the 18th November, 2022: Central Young Mizo Association (CYMA) leh Mizoram State AIDS Control Society (MSACS) te bultuma HIV/AIDS hluar zel tur dona kawnga hmalakna, 'Zoram Harh Rawh Campaign' kaltlanga Branch YMA te tana Mizo hnam lam leh pipu zai hmanga intihsiakna chu vawiin khan Champhai District Level Organising Committee on Zoram Harh Rawh Campaign buatsaihin Kahrawt Community Hall leh Field-ahte buatsaih a ni.

Khuallian Pu James Lalrinchhana chuan Zoram Harh Rawh Campaign kaltlanga hnam lam leh pipu zai intihsiakna a taka puitlin ani thei chu lawmawm tiin, tha thawhtute chhuanawm a tih thu a sawi a. HIV/AIDS dona chu vawiin mai nilo nikin zel thlenga chhunzawm anih dawn thu sawiin, beidawng lova do zel a tul thu leh theihtawp chhuahnain awmzia a neih thin thu a sawi a; inthlahdah erawh a thianglo a, kan inthlahdah chuan awlsam takin a rawn pung vat dawn a ni, a ti a. Ram thang mekah ei leh in leh inenkawlna a that tawk loh avangin AIDS a pung chak a, thihna chhan hluar ber pahnihna a ni pha hial a, ram sum leh pai dinhmun thlengin a nghawng nasa em em a, khawtlang a nghawng nat avangin tha thlah a thiang lo a ni, a ti a. International border depa awm leh insumdawntawnna hnaivaia awm kan nih avangin hrileng hrang hrangte lakah kan fimkhur zual a ngai a, nasa taka min la hrual theih avangin inpuahchah lawk a ngai a ni, a ti bawk.

Zoram Harh Rawh Campaign MSACS leh CYMA bultuma huaihawt a ni chu lawmawm tiin, HIV/AIDS chungchang inhrilhhriatna chu thupui bera neih a ni a ti a. Zirna leh thiamna kan uluk pauh leh inzirtirna a darh zau thei dawn a ni tiin,  thalaite chu rualelna tha nei tur leh ruihhlo leh a kaihhnawih laka fihlim tum turtein a chah a. Theihtawp chhuah mek zel ani chunga ruihhlo man tur a awm reng mai chu veiawm a tih thu sawiin, ruihhlo man leh beihlet kawnga force hrang hrangte leh NGO te hmalakna fakawm a tih thu a sawi a. Ruihhlo tawlh, zuar leh inhnamhnawih man chhuahte chungah dan anga hremna lek kawh zel tum a ni a, ruihhlo do kawngah pawh kan tanrual zel a tul dawn a ni, a ti bawk.

Kalkhawmte chu kristian nundan tha ngaisangtu YMA taka nung tur leh thil tha lo te do chung zela theihtawp chhuah turin a chah a. Champhai District-a pipu sulhnu tam tak hmuh tur a awm chu vanneihthlak a tih thu sawiin, kan vawnhima kan hlut thiam chuan pipu nun zonun zemawi thlenga chawisan kawngah min tanpuitu a ni thei dawn a ni, a ti a. Zonun zemawi leh kristian nundan mawi kan chhawmnun phawt chuan AIDS leh ruihhlote kan do hneh thei dawn a ni, a ti a. Champhai District mipuite chu AIDS leh ruihhlo do kawnga theihtawp chhuahpuiah a sawm nghal bawk a ni.

He hun hi Pu F. Lalrinmuana, President, Sub-Hqrs. YMA Champhai chuan a kaihruai a. Pu Lalthlamuana Ralte DIS, DAPCU Champhaiin AIDS chungchanga hriattur pawimawhte a sawifiah a. Judge-te aiawhin Pu J.Lalmuanpuia'n endikna neih dan leh hmasawn ngaihnate a sawi a. Pu Lal Chhanhima Zofa, Sub-Hqtrs. YMA Champhai Fin. Secretary-in lawmthu sawiin hun a khar a ni.

Zoram Harh Rawh Campaign hnam lam leh pipu zai hmanga intihsiaknaah hian YMA Branch 4; Kahrawt, Venglai, Zotlang leh Kanan Branch YMA te an tel a. Khuallam leh Cheraw Kantluang  bakah pipu zai hmangtea intihsiakna neih a ni a. Intihsiakna hrang hrangte belhkhawmin a pumpuiah Kahrawt Branch YMA Cultural Troupe-te pakhatna niin, lawmman pawisafai Rs 50,000 an dawng a. Kanan Branch YMA Cultural Troupe-te pahnihna niin, lawmman pawisafai Rs 30,000 an dawng a, pathumna Venglai Branch YMA Cultural Troupe te'n lawmman pawisafai Rs 10,000 dawngin, palina Zotlang Branch YMA Cultural Troupe-te chuan lawmman pawisafai Rs 5,000 an dawng a ni. Intihsiaknaa pakhatna dinhmun hauhtu Kahrawt Branch YMA Cultural Troupe-te hi Zoram Harh Rawh Campaign State Level intihsiaknaah Champhai District aiawhin an tel dawn a ni.