2723/2022-2023

Lunglei the 18^th November, 2022 – Lunglawn, Lunglei chuan an kum 125 tlin lawmna (Quasquicentennial Celebration) pualin vawiin khan Lunglawn Field ah program an buatsaih a. Agriculture Minister leh Lunglei West bialtu MLA ni bawk Pu C. Lalrinsanga chuan khuallian niin a hmanpui a. Bamboo Development Board Vice Chairman leh bialtu MLA ni bawk Dr K. Pachhunga chu khualzahawm a ni.

Lunglawn Quasquicentennial Celebration pual hian November ni 15 atang khan hun hman tan niin Souvenir tlangzarhna, Lal Thlan Hawn leh Monument Hawnna hun te lo hman tawh niin zaninah Lunglawn Field-ah concert neiin lawmna hi khar a ni ang.

Vawiin lawmna inkhawm Pu V Vanlalhriata, Chairman, Quasquicentennial Celebration Committee kaihhruaiah Minister Pu C. Lalrinsanga chuan Lunglawn khua in kum 125-na hmang theia Pathianin a hruai chu lawmawm a tih thu a sawi a, Lunglawn mipui zawng zawngte duhsakna a hlan a. Kum 125 tlin lawmna ropui leh kokim taka hun an hmang thei hian an inlungrualna leh in hmangaihna a lantir tak meuh a ni tiin, hun lo kal zel turah pawh inhmangaih a, in lungrual zel turin Lunglawn mipui te chu a fuih a ni. Lunglawn mipuiten zirna an ngaih pawimawhna te, politics thianghlim taka an kalpui thin na te, inkhawm an uar na te chu a ngaihsan awmin chhawmnun zel a pawimawh takzet a ni, a ti a. Lunglawn khaw chhuak Mizoram politics leh zirna lama mi hmasa te bakah Padma Shri dawng mi pahnih Prof Darchhawna leh Pu RK Lalhluna te zahna chibai bukin Lunglawn mipuiten hmasawnna tha tak an chan zel theihnan duhsakna a hlan a ni.

He huna khualzahawm Bamboo Development Board Vice Chairman leh bialtu MLA ni bawk Dr K. Pachhunga pawhin thu sawiin Lunglawn in hmasawnna hrang hrang a neihte, a bik takin zirna leh thiamna kawnga hmasawnna awmte chu chhuanawm a tih thu sawiin mipui kalkhawmte chu Lunglawn Quasquicentennial chibai a buk a. Lunglei South Assembly Constituency huamchhungaveng leh khuate tih hmasawn kawngah theihtawp chhuah zel a tum thu sawiin mipuite tawiawmna leh finchhuahna a ngen a ni.

Vawiin program-ah hian Lal Chhungkaw aiawh atangin thusawina ngaihthlak niin zai leh cultural program-te neih a ni.