2680/2022-2023
Dated Serchhip, the 15th November, 2022: Vawiin khan Dy.Speaker leh Tuikum Bialtu MLA ni bawk Er.Lalrinawma chuan Chhingchhip Mualpui ah leh Phulmawi khuaah Health Clinic Centre thar a hawng.

A hawnna inkhawmah te Er. Lalrinawma chuan thusawiin, a bial chhung khaw pahnih a Health Clinic Centre an hawng leh thei ta chu lawmawm a tih thu a sawi a, an ruahmanna te hlawhtlin tirtu Pathiang chungah lawmthu a sawi a. Khawtlang mipuite inpekna vanga Centre tharte chu lo puitling ta a nih thu a sawi bawk. Hriselna hi mihring nunah thil pawimawh tak anih avangin mipuiten hriselna hlutzia kan hriat thar zel a pawimawh a, nunkawng hrisel zawk kan neih theih nana kan inzir chhoh zel a tul thu pawh a sawi a ni. Ram leh hnam changkang apiangin hriselna an ngai pawimawh thin a, hriselna leh hmasawnna hi thil kal dun zel a nih avangin kan ramin hma a sawn deuh deuh theih nan mipui hriselna hian kawngro a su nasa hle a ni, a ti. Tun hnaiah Sorkarin hmun tam tak ah Clinic Centre a hawn thu sawiin, Tuikum bial mipuite pawhin an tangkaipui em em a, sawrkar chungah lawmthu a sawi a ni.

Clinic Centre thar pahnih hawnna ah hian Health Department aiawh te pawhin thusawina hun an nei a. A bial mipuite hriselna a ngaih pawimawh thin avangin Er. Lalrinawma chungah lawmthu an sawi a ni.

Mualpui Health Clinic hawnna inkhawm hi Pu.C Lalnuntluanga VCP in kaihruai in, Pi Lalsiamliani, MHIP President in tawngtaina a hmang a. Phulmawi Health Clinic hawnna inkhawm tawi hi Pu Rohnuna, VCP in kaihruaiin Upa K.Vanlalbuka'n hun serh a hmang a ni.