Vawiin khan Tuirial Air Field a Centre for Post Harvest Processing & Research hmuna Womens Technology Park chu Pu R. Lalrinawma, Deputy Speaker helai bialtu ni bawk chuan a hawng.
Hawnna thu sawiin Pu R. Lalrinawma chuan mi harsa zawkten eizawnna ngelnghet an neih theih nan leh dawmkan chhoh nan NLUP hmangin sorkar chuan theihtawp a chhuah a, Mizoram hmun tam tak ah NLUP trade hrang hrangah eizawnna atana hmang thei ngei turin mi tam tak in hma an la mek a, NLUP leh CDAR te chu thawk dun an ni tiin helai hmuna cheng hmeichhia te chu rilru leh tih tak zeta thawk tur leh training te pawh ngai pawimawh tur in a chah. Council of Scientific and Industrial Research Central (CSIR) leh Central Mechanic Engineer Research Institute (CMERI) atanga lo kal mithiam ten an enpui reng dawn avangin a tir atangin uluk tak leh taima taka zir tur in a chah bawk.
Pu S. Sen Sharma, Chief Scientist, CMERI, Durgapur atanga lo kal chuan Ministry of Science and Technology, Govt. of India te chuan kum 2006 atanga helai hmuna hna lo tan tawh an nih thu sawiin Mizo hmeichhia te chu hna an thawk nasa in an taima hle a, chu chu a mit ngeia a hmuh fo thu sawiin tunah hian Community Development Action and Reflection (CDAR ), Aizawl te nen thawhhona tur tha tak an nei chu lawmawm a tih thu a sawi a. Heng sawhthing, aieng, hmarcha leh thlai dang te hmang hian kuthnathawktu tam tak an chawikan theih ngei a beisei thu a sawi. Mamawh hrang hrang technology lam hmanrua te CMERI atanga an rawn ngaihtuah sak zel tur thu leh hmeichhe taima leh tumruh tak tak an nih avangin theihtawpa rawn tanpui zel an tum thu a sawi bawk.
Khual zahawm Dr. Richard Blanchard, Loughborough University, Leicestershire, UK atanga lo kal chuan tuna Womens Technology Park an hawn hi thil pawimawh tak anih thu leh hmeichhia te dawmkan paha Mizorama thlai thar leh thei rah te, rei tak dahthat theih tur leh hralhchhuah theih tura sawngbawl leh pickles leh a chi dang danga vawn that dan te an zir chho dawn tih sawiin hlawhtling ngei tura a duhsak thu a sawi a ni.
Helai hmun enkawltu Pi PC Lalawmpuii, CDAR chuan he training programme hian kum thum a awh anga, an training apiangin nitin Rs. 250/ zel an hlawh thin bakah an ei leh in zawng zawng pawh CMERI in an tum sak dawn a ni a ti a, Pickles ilo vel siamna tur khawl hrang hrang, a hersawmna leh chawhpawlhna Rs. Nuai 10 chuang man te pawh tunah a lo thleng tan mek a, thil siam chhuah atanga an hlep chu an insem zel dawn tih sawi in training hun chhunga titha zual te chu CMERI hian an ruai chhunzawm zel tur thu a sawi.
