Vawiin khan Zuangtui Community Hall-ah Dy.Speaker Pu R.Lalrinawma chuan YMA Day vawi 83 lawmna a hmanpui.

Khuallian Pu R. Lalrinawma chuan thusawiin kan mi hmasa ten YMA an lo din hi thil lawmawm tak niin YMA chu mi harsa te tana inpe, kumtluanin chhiatni thatni-ah engkim buaipuia che chhuak thin an ni, a ti a. Ram leh hnam pawhin kan vanneih phah em em a, ram pum huapa tlawmngaipawl tangkai tak a ni, a ti a. YMA thupui leh thil tum hrang hrang hlenchhuah tum turin mipuite chu a chah a. Kan ram leh hnam humhalh hi midang tih turah ngai lovin mahni theuh hian tan lak a ngai a, tharum ringawt ni lovin kan finna, thiamna leh zirna hmangin kan humhalh thei a ni, a ti a. Central Service lamah mizo kan tlem telh telh a, thalaiten theihthawp kan chhuah a ngai a ni, a ti a. Ram changkangah chuan an ram leh hnam tan thahnem an ngai em em a, kan hnamzia tlawmngaihna te, hawihhawmna te, rinawmna te, intodelhna te thalaiten kan chhawm chhoh zel a pawimawh a ni, a ti a. Thalaite chu thawh hreh neilo turin a chah a. Hlim taka YMA Day hmang turin duhsakna a hlan nghal a ni.

Programme hi Zuangtui Yma Branch Vice President Pu Ramdinliana'n a kaihruai a. YMA member boralte sunna hun neih a ni a. MUP Zuangtui Unit leh Local Council atangin ngaihthlak a ni a. Khuallian chuan YMA run sak mek chhunzawmna tur bakah inkhelhna hmanrua Zuangtui YMA Branch hnenah a hlan a. YMA section 5 awmin Chawngbawla Section, Vanapa Section, Khuangchera Section, Taitesena Section, Saizahawla Section, Neuva Section atangin report ngaihthlak a ni a. Hei hi section hrang hrang lengkhawm zai intihsiak in a zui a ni. Chawhnu lamah sports-a section inelna neih a ni a, zan lam programme in a chhunzawm leh ang. Vawiin hian YMA member 180 vel an tel a ni.