Nimin Dar 4 khan Nihnih awh NLUP Kutpui Mamita hman mek chu Pu Lalrobiaka, MLA, ZIDCO Chairman ni bawk chuan khuallian niin kharna hun a hmang.

Khuallian chuan khuarel chhiatna nasa takin Mizoram a tuam chunga NLUP Kut hlawhtling taka hman a ni thei chu lawmawm a tih thu sawiin NLUP avangin Mizoramah intodelhna a thleng chho zel a. Tunah hian Subsistance economy atangin Market economy-ah kan awm tawh a ni a ti. NLUP dawng hlawhtlinpuitute hi nasa takin mipuite'n kan chhawr tangkai mek a. Sorkarin Flagship Programme NLUP a siam hi kan vannei hle a ni a ti.

MLA, ZIDCO Chairman ni bawk chuan  mipuite'n tun aia nasa lehzual hian kuthnathawh kawngah hma kan la thei a. Thil tithei lo tlata kan inngaihna hi kan paih a hun tawh a ni a ti.

Khuallian chuan NLUP hmanga tan la a, Information Technology hmanga kan lo neih dan leh kan eizawnnate tihhmasawn zel kan tum tur a ni tiin sum chang thei tur thlai kan thlan thiam a pawimawh thu leh Sorkar chu mipuite siam a nih angin mipuite ta a ni a, kan chhawr tangkai thiam tur a ni a ti.  "Kristian chu a rethei tur a ni lo" tih hrerenga Sorkarin theihtawp a chhuahlaia tha taka ti turin kalkhawmte a chah bawk.

Vawiin NLUP kharna hun hi Pu Bhupesh Chaudhary, Mamit District Bawrhsap-in a kaihruai a. NLUP Kutpui hi Mizoram District hrang hrangah hman tawh niin Mamit hi a tawp kharna a ni.

NLUP KUT Mamit-a hman a nih chhung hian NLUP Line Department hrang hrangte chuan an  tharchhuah leh siamchhuahte  mipui tana lei theihin an phochhuak a, mipuite'n an hlut hle a ni. Hetiang hi Kut hman chhunga Line Department hrang hrangte in hralh dan a ni. Fisheries Department te hian Sangha hring 3ql, a rep 1.50ql leh a fry sa kg 80 Rs 1,06,000/- ( nuaikhat sangruk) man an hralh a. Industries Department-ah hian stall panga 5 awmin Hair cutting-ah hian Lu 83 meh a ni a, RT Restaurant- hian Rs 4850( sangli zariat sawmnga) an laklut a. Zonunsang Stall-te hian Rs 350,000/- ( nuai thum singnga) man an hralh a, Helen Stall-te'n Rs 380,000/- ( nuaithum singriat) man an hralh bawk a ni.  Lalduhsang Tailoring te hian Rs 6,000/-( sangruk) chuang man in hralhin, Blacksmithy Trade te'n chem favah etc Rs 3,000/- ( sangthum) man an hralh bawk. Agriculture Department hnuaiah hian Stall pali awmin Rs 44,925/-( singli sangli zakua sawmhnih panga) hralh a ni a, Horticulture Department-te hian Stall pahnih neiin Rs 31,710/- ( singthum sangkhat zasarih sawm) an hralh a ni. Environment Forest& Climate Change Department-te hian Stall thum neiin Rs 67,200/-(singruk sangsarih zahnih) man an hralh bawk a, Soil & Water Conservation Department-te hian stall pahnih neiin Rs 14,500/- (singkhat sangli zanga) man an hralh a ni, Sericulture Department-te hian Rs 31,614/- (singthum sangkhat zaruk sawm pali) man an inhralh a, AH & Vety Department te hian Rs 42,970/- (singli sanghnih zakua sawmsarih) man an hralh bawk.

Heng bakah hian Health Department hnuaiah Blood Sugar leh Blood Pressure bakah Chuap hrisel leh hrisel loh Kut chhimtu mipuite ensak an ni a, DIPRO/Media Officer-te chuan NLUP hlawhtlinpuitute hlimthla Projector hmangin Video a entir a ni a, Success Still Photo hrang hrang thlir tur an chhawpchhuak an chhawpchhuak bawk. Kut chhimtu mipui zawng zawngte tan nihnih chhung hian Lucky Coupon man neilo a siam niin mi vannnei bik thlanchhuahte hi lawmman siamsak an ni bawk a ni.