2213/2023-2024

Aizawl 9th October, 2023 : Pu Tawnluia, Deputy Chief Minister chuan vawiin khan Dawrpui-a Aizawl Smart City hnuaia Aizawl New Market (Modernisation of Bara Bazar) sak mek chu a tlawh.

Dy. CM chuan Building sak mek chu a len leh a rih dawn em avangin a lei ngheh leh ngheh loh Geology & Mining mithiamte, Mizoram mai bakah Mizoram pawn lam mite rawn an ni a. Smart City project anih avangin a sakna tur sum pawh awmsa a ni a, Contractor te pawh an sak zawh rual ruala sum pek tlak theih anih thu a sawi a. Building sak vanga New Market chhunga eizawngte leh a bul hnaia sumdawngte tan harsatna a awm anih pawhin hrethiam hram hram tura ngenin Smart City Project chu nakum June thleng chauh ani a, mipuite thlawpna leh tawiawmna a ngen tak meuh meuh a. Contractor te pawh an hna quality tha se, working session chhung ngeia sa zo turin a ngen nghal bawk a ni.

Pu Robert Romawia, bialtu MLA pawhin Bara Bazar Building hlui chu a sakna a rei tawh avangin mipuite tan a him tawk tawh lova, New Market building sak thar a ni chu a lawmawmin mipuite tan a pawimawh hle a ni a ti.

Aizawl New Market building sak thar mek hi 'City Centre at Bara Bazar, Aizawl" tiin Aizawl Smart City Limited chuan Smart City Mission hnuaiah a sak that hna hi a thawk mek a. Project approved cost hi ?41.59 Cr. a ni. Building sak hna hi Lushai Engineers te'n thawkin thutna/sumdawng mi 1105 leng tura buatsaih a ni.

New Market Sumdawng Jt. Association Secretary Pu PC Malsawmtlunga chuan building hluia sumdawnga dawr nei te chu building tharah pawh hian dawr ruahmansak vek an ni tur chu lawmawm tiin sorkar chungah lawmthu a sawi a ni.

Minister hi Pu CC Lalchhuangkima, CEO, Smart City, Aizawl, Pu PC Malsawmtluanga, Secretary, New Market Sumdawng Joint Association, Local Council hruaitute bakah officials leh Contractor te'n an tawiawm a ni.