Mizoram Envionment & Forests Field Staff Association chuan vawiin khan General Conference vawi 11-na Central YMA Hall Tuikhuahtlang-ah an hmang a. E & F Minister Pu H. Rohlunan a hmanpui.

Minister chuan Conference palaite hmaah thusawiin vawiina conference hmangtute chu department chhungah pawh a hmatawng tak tak chhun leh zan pawh sawi lova hnathawk thin an nih avangin inpekna tak tak nena thawk turin a sawm a. Mizoram chhung nungcha leh ramngaw humhalh hi department a thawktute ringawt thawh sen a nih loh avangin tlawmngai pawl hrang hrangte tawiawmna ah lawmthu a sawi a. Thawhpui zel atan a sawm nghal a ni. Minister chuan he department-a thawktute zingah sa pel hmang an awm a nih chuan ngaihdamna a awm lovang a ti a. Sik leh sa inthlak danglam ta lutuk khawvelin a tawn mekah hian nungcha leh ramngaw humhalhtu department chuan chona lian tak a tawng mek a ni a ti.  

E & F Field Staff Association-ah hian Dy. Ranger atanga Forest Guard an tel a. Vawiinah hian ramngaw leh ramsa humhalh nana hmalak thar chungchangah te mipui mimir zau zawka hrilhhriat dan turah te agenda engemaw zat neiin conference hian a rem tih pui hlawm a ni.