November ni 11-14, 2009 chhunga neih tur Training of Trainers (ToT) on Microplanning, Accounting, Book Keeping, Value Addition of Non-Timber Forest produces (NFTP), Institutionla Linkages such as Self-Help Groups (SHGs) under national Afforestation programme (NAP) chu Environment & Forests Dept. Conference Hall, Aizawl-ah a hawng. Hawnna inkhawm Dr.S.S.Garbyal, PCCF & Secretary kaihhruai ah hian Pu R.C.Thanga, Chief Conservator of Forests/Nodal Officer, Forest Development Agency, Mizoram-in keynote address a pe a. Planning Commission-in tun kum 5 kalta chhunga India state tam ber aia Mizoram-in ramngaw siam belh kawngah hna thawh that leh forest cover a neih that avanga thilpek Additional Central Assistance (‘Green Bonus’) hnuaia cheng vaibelchhe 38.17 lai pek hman dan tur chungchang hrilhfiahna leh zirtirna hun Pu L.R.Thanga, Chief Wildlife Warden-in a hmang bawk a ni.

 

 

Training hawngtu E&F Minister chuan Mizoram sorkar chuan a hnathawkte training a ngaih pawimawh hle tawh thu sawiin Department dangte aiin Forest Department Officers ten training an neih that thin avangin a lawmawm a ni, a ti. Tun hnaia Delhi-a Union Minister for Environment & Forests Pu Jairam Ramesh a hmuh tuma Mizoram-in forest cover a neih that thu te, village level-a community forests, Supply & Safety Reserved neih that thu a hrilh chuan a beng a verh hle thu leh Mizoram atangin state dangte tan pawha entawn tlak tur Concept paper rawn thehlut turin a chah nghe nghe thu a sawilang. Mizoram chu India ramah forest cover neih that lamah pathumna a nih avanga sorkar laipui atangin sum tam tak kumin 2009-10 chhung atan hmuh a nih chu a vanneihthlak a ni tiin Pu Rohluna chuan hei hian department hnathawkte mai bakah mipuite chungah Mizorama ramngaw leh nungcha humhalhna kawngah chona leh mawhphurhna lian tak a keng tel a ni, a ti bawk. India ram chu economy thang chak ber zingah telin khawvel politics-ah pawh ngaipawimawh a hlawh zel a, environment lama tui ram hruaitu kan nei bawk nen, environment & forests humhalh a ngaihven thar pawh hi thla leh maia Denmark khawpui Copenhagen-a Climate Change Summit atana inbuatsaihna chi khat anih zia sawiin Minister chuan Mizote pawhin environment humhalh tura sum leh pai kan dawn thinte chu a nihna tur dik taka kan hman a tul tak zet a ni, a ti.

PCCF Dr.S.S.Garbyal pawhin thu sawiin India rama forest chungchang ruahmanna tam tak a hlawhchham fo thinna chhan chu a ram hrechiang lovin thuneitu ten policy leh scheme te an siam thin a, tunah erawh chuan a hmuna thawkte atanga rawtna lakhawmin policy mumal tak chhawpchhuah tum a ni, a ti. Tuna Training chhung pawhin forest officers te chuan micro-planning leh accounting an zirtur chu sorkar laipui atanga tanpuina rawn kal tur zawng zawng felfai tak leh langtlang thei tura an khawih thiam nan a puih ngei a beisei thu a sawilang.

Kum tin November ni 10 hi Forest department hnathawk, an duty-a nunna chante hriatrengna ni ‘Forest Martyrs’ Day’ puala hman thin a nih angin vawiin training hawnna inkhawmah pawh kum kalta chhunga Mizoram sorkar Environment & Forests Department hnathawk hmun hrang hranga an duty-na hmuna nunna chantate zah entir nan minute 1 chhung ngawi renga din a ni.

Vawiina tan tak Training-ah hian Mizoram pum atangin Conservator of Forests, DFO/DCF, ACF leh Range Officers 50 lai an tel a ni.