East Tuipui Bialtu MLA Pu T. Sangkunga, Mizoram Youth Commission Chairman chuan Vanzau khuaa Farmers' Association huaihawt "Lo zawh runpui" chu nimin piah (14.09.2016) khan a hmanpui. Pu T. Sangkunga chuan Vanzau khua chu khaw taima leh intodelh thin an nih angin an khaw hmingthatna chhawm nung zêl turin lo nei mite a chah a. Hnathawk tur chuan hriselna a pawimawh thu sawiin lo neitute'n an hriselna ngai pawimawh se a duh thu a tarlang bawk.

MYC Chariman chuan kum tina ramngaw vât chhe lova huan nghet leh sumchang thlai ching uar turin khaw mipuite chu a ngên a. Thangtharte'n tui taka hna an thawh theih na turin hnathawh dan thar leh hlawk zawk kalpui a pawimawh thu a sawi bawk.

Vanzau khuaah hian chhungkaw 162 awmin, kumin 2016 hian Tuiaw phai ram chu lo atan an theh a; chhungkaw 121-in thingtlang lo neiin buh tin 153 an chin bakah sawhthing quintal 475 an ching bawk a. Heng bakah hian chhungkaw engemaw zâtin hmarcha an ching a ni. Lo lama hun hman zawh hnu hian Vanzau Community Hall-ah khawtlang huapin Pathian hnena lawmthusawi inkhawm hman chhunzawm in, lo zawh lawm nân hian tlang ruai buatsaih a ni a, khawtlang mipuite'n hlim takin ruai hi an kilho a ni.