Khawbung RD Block hnuaia Mizoram State Rural Livelihoods Mission (MzSRLM) kalpui ?an tur chu nimin (15.09.2016) khan Bialtu MLA Pu T. Sangkunga, Mizoram Youth Commission Chairman chuan a hawng. Hawnna inkhawm, BNRGSK Conference Hall, BDO Complex-a buatsaih hi Khawbung BDO Pu James Lalnithanga’n a kaihruai a; he RD Block-a Mizoram State Rural Livelihoods Mission hmalakna keng kawh tur mi pali - Block Mission Manager pakhat leh Cluster Coordinators pathum te chuan hna an zawm nghal a ni.

Bialtu MLA Pu T. Sangkunga chuan Rural Livelihoods Mission hian a tum ber chu thingtlanga Self Help Group (SHG) din leh, a lo ding tawh sa te sawhngheh a, eizawnna ngelnget an neih thei nana inthlunkhawmna (federation) siam sak leh awmze nei taka sum leh pai hman dan inzirtir a dinchhuahna kawng kawhhmuh a ni, a ti a. He hmalakna hian hmeichhia dinhmun siamthat leh chawisan keng telin a ngai pawimawh hle bawk a. MYC Chairman chuan state thenkhat ah chuan Self-Help group-te tha taka intelkhawm in thahnemngai taka an thawh avangin chhungkua mai nilo khawtlang pumpui hnasawnna thlen in, an hlawkpui phah hle thu a tarlang a; Mizoram ah pawh kan Self-help group te hian ruahmanna fel tak hnuaia member te'n an pawl an kalpui chuan chhungkaw ei leh bar zawnna tling hna neih theihna a ni tih a chiang hle a ni, tiin kalkhawmte chu rinawmna leh taimakna nena hma la turin a chah a ni.

State Mission Manager Pi Ruth Lalawmpuii hnen atangin National Rural Livelihood Mission chungchang leh Mizorama kalpui dan phung ngaihthlak niin, Sorkar laipui-a Ministry of Rural Development in thingtlang mipui ten eizawnna ngelnghet an neih theih nan leh thingtlang-a mirethei te chawikan nan programme a kalpui thin Swarnajayanti Gram Swarozgar Yojana (SGSY) thlak nan National Rural Livelihoods Mission (NRLM) a siam thu leh, hemi zulzui hian state sorkar zawng zawngte chu Mission din a bultan tura tih an nih thu leh, Mizorama hi hmarchhak biala a bultan hmasa ber a nih thu a sawi a ni .

Khawbung RD Block-a Rural Livelihoods Mission hawnna inkhawmah hian tlawmngai pawl hrang hrang te, khawtlang hruaitute leh Self-help Group a tui mi engemaw zat an tel a ni.