Vawiin hian Serchhip DC Committee Room ah Serchhip Town Cleanliness Committee member te chuan, an Chairman Dr. Lalrozama, IAS, Serchhip Bawrhsap ni bawk hovin kum 2016 FAINA HAPTA, October ni 1 - 7 inkara hman dan tur an rel.

Committee chuan Faina Hapta chu October ni 2 a hman tan thin ni mah se, kuminah chuan Pathianni a nih avangin October ni 1 a a hawnna neih nise tiin a rel a. A hawnna inkhawm hi zing dar 7:00 am ah DC Office tualah Pu Mahatma Gandhi-a lim kiangah neih nise, hun hman dan tur kimchang chu DC Office leh DLAO lamin lo ruahman se, an ti a. A kharna hun erawh chu October ni 7, chawhnu dar 1:00 pm ah DC Conference Hall ah neih ni thung se, an ti a.

Faina Hapta chhung hian Serchhip khaw chhung hmun thumah leh Chhiahtlanga hmun khatah Banner tar a ni ang a, Serchhip Town chhunga Village Council zawng zawngte chu khawtlang faina lama he Hapta denchhena hmalakna nei tura beisei niin an mamawh zual phuhruk nan tanpuina pawh pek tura ruahman a ni. Hapta denchhen hian sawrkar pisa zawng zawngte leh zirna in zawng zawngte tan faina lama inelna buatsaih a ni ang a, kohhran hrang hrang te pawh faina hapta pual hnatlang nei tura ngen an ni ang. Tin, Taxi Stand, Auto Stand, Sumo Stand leh Bazar hmunte chu hnatlanga member ten lo tifai theuh tura ngen an ni ang a, Serchhip Town Area huam chhunga zirna in zawng zawngte chu Hapta chhung hian tum khat tal Faina chungchang Lecture an school a buatsaih vek tura ngen an ni bawk ang.

Hei bakah hian Serchhip Town Area huam chhunga school naupang zawng zawngte huapzo Programme lian tham buatsaih tura ruahmanna siam a ni bawk a, programme kimchang lo ruahman turin District Project Officer/DLAO leh DC lam chu ruat an ni.

Faina Hapta hman dan tur relnaah ah hian official member hrang hrang te, VC tin aiawh te, chanchinbumite leh tlawmngaipawl aiawhte an tel a ni.