4978/2025-2026

Champhai, dated 24th March 2026: Vawiin khan East Tuipui bialtu MLA Pu Ramthanmawia chuan Vangchhia Haw Runpui Khullian niin a hman pui.

Khuallian Pu Ramthanmawia chuan thusawiin Vangchhia khua in khawchhuak tlang hrang hranga awm tawh te in hmuhkhawmna hun tha tak mai an buatsaih chu tha a tih thu sawiin he hun hian Vangchhia khua leh tuite in unauna ti zual zel se, taksa leh thinlung lamah hmasawnna duhawm tak nei tura a duhsak thu a sawi.

Khuallian chuan "Vangchhia khua chu Mizoram khua te zinga khawhlun leh pawimawh tak mai Pi leh Pute lo thlangtlakna hmasa AD 500 - 1500 vel pawha mi lo khawsak tawhna , Mizo History sawia sawi tel ziah ngai, Pu leh pute sulhnu hlu tak tak te leh Kawtchhuah Ropui awmna, Mizoram khua te zinga Khualzin te tlawh chak ber pawl a ni. " a ti a. Khualzin tam zawk lo dawngsawng thei tura in buatsaih chhoh a tul thu leh Pi leh pute sulhna tha tak a humhalh chhoh zel a pawimawh thu a sawi bawk.

Khuallian chuan - Khawtlang hmasawnna tura zirna kawnga tan lak a tul zia te, Ramngaw leh tuihna humhalh tul zia te, Ruihhlo in kan ram leh hnam a tih chhiat nasat zia leh khawtlang tangruala do a tul tawh zia te, Dik taka sum leh pai lak luh a that thu leh sum leh pai lak luh ang ang te khawl nachang hriat a that zia te sawiin Haw Runpui hmang tura kal khawmte a fuih bawk.

Vangchhia khua hi kum 1885 a Sailo Lal Thawmpuia, F Liansuaka leh Neihchungnunga te unau in an sah a ni. Vangchhia khua hi Hualngo leh Vangchhe hnam te a hlawma an lo khawsak tawhna niin kum 141-na a hmang mek a , Chenna In 170 khuaa chhal niin mihring 1000 bawr an khawsa bawk a ni.

Vangchhia Haw Runpui hi March ni 24-26 2026 chhunga hman tur a ni a. Hun khatna vawiin Vangchhia Community Hall a neih hi Pu F Malsawmtluanga Organising Chairman in a kaihruai a, Pu T Lalzuimawia Vice Chairman Organising Committee in inlawmna thu a sawi a, Khuallian Pu Ramthanmawia bakah Lal chhungkua atang te, Vangchhe Hnam atanga te leh Aizawl Welfare te atangin thusawi ngaihthlak a ni. Special Item hrang hrang bakah Kum 70 chunglam te hnenah lawmpuina hlan a ni bawk.