3173/2023-2024

23rd December, 2023: Nimina Eastern Zone School Band Competition Bhubaneswar-a neihah Govt Mizo High School Pipe Band Boys chu pakhatna an ni a, Pipe Band Girls-ah Govt Mizo High School Girls chu pathumna an ni bawk. Mizo High School Pipe Band boys hi National Level School Band Competition January 21-22,2024-a National stadium N.Delhi-a neihah Eastern Zone aiawhin an tel leh ang.

School Band Competition hi Ministry of Education-in Ministry of Defence-te nen thawk hovin kum tin a buatsaih thin a, State level leh Zonal level te chu Samagra Shiksha ten an buatsaih thin a, National level chu NCERT-in a buaipui thin a ni. Band competition hi  chhawng thumin intihsiak thin  a ni a. State level School Band competition neih hmasak ber thin a ni a, chuta pakhatna theuhte chu Zonal level competition-ah an inel leh a, Zonal level-a tithate chu National levelah an intihsiak leh ta thin a ni.

Zonal level-ah hian India ram state leh UT te hi zone li-ah an then a, Eastern zone, Western zone, Southern zone leh Northern zone tiin then a ni. Mizoram hi Eastern zone-ah kan awm a, Eastern zone-a awm te chu- Jharkhand, West Bengal, Odisha, Arunachal Pradesh, Assam, Meghalaya, Manipur, Mizoram, Nagaland, Tripura lehn Sikkim te an ni. Zonal level hi Bhubaneswar-ah neih a ni. Zonal level competition-a tithate chu National level N.Delhi-ah an intihsiak leh ta thin a. Finalist team te phei chu Republic day lawmna N.Delhi-ah an perform thin a ni.

Band competition hi Brass band leh pipe band-a then a ni a. Mipa leh hmeichhia a hrang ve ve-in an intihsiak thin a ni.  Mizoram atangin Govt Mizo High School naupang mipa leh hmeichhe band-te chu pipe band competition-ah hian an tel ve a, Mizoramah midang elpui tur an awm loh avangin an ni hi Zonal level-a tel tura thlan an ni a. Zonal level-a tel State dangte nen an intihsiak a ni.