3667/2023-2024
Aizawl, the 5th February, 2024: ECI chuan inthlan kaihhnawih campaign leh hmalakna reng rengah naupang hman khap tlat a nih thu leh hetiang zawnga hmalakna a awma man chhuah a nih chuan an chungah ngaihhnathiamna a awm dawn loh thu vawiin khan a chhuah. Party, candidate leh inthlanna kaihhnawiha thawktu zawng zawngte chu engti kawng pawha Political campaign leh rally-a naupang hmang lo turin a hriattir a ni.
India rama inthlan campaign thianghlim leh felfai tak neih a nih theih nan leh, pianphunga rualbanlote zahawmna vawnghim chunga hmalak chhunzawm zel a nih theih nana thupek a lo siam tawhte chhunzawm zelin, Election Commission of India chuan inthlan kaihhnawih thil eng pawha naupang hman chungchangah thupek khauh tak a tichhuak a. Political party-te chu inthlan campaign-ah naupangte chu eng ti kawng zawng maha hmang lo turin a hriattir a; poster/pamphlet sem emaw, slogan au chhuah emaw, campaign rally, election meeting leh a dangtea tel tir lo turin a hriattir a. Commission chuan inthlan kaihhnawiah engti kawng zawng maha naupang hman a rem loh thu leh hmanglui an awma man chhuah an nih chuan an chungah ngaihhnathiamna lantir a nih dawn loh thu party leh candidate-te a hriattir a ni.
Hriattirna tih chhuahah hian a hnuaia mite hi ngaih pawimawh a ni:
1. Inthlan kaihhnawih thila naupang tel khap: Political party-te chu inthlan campaign chi hrang hrang, rally, slogan au chhuah, poster emaw pamphlet sem emaw, inthlan kaihhnawih thil dang emawah naupangte tel lo turin chiang takin hriattir an ni a. Political hruaitu leh candidate-te chuan naupangte chu engti kawng mahin campaign-na atan an hmang tur a ni lova, naupang kuah emaw, lirtheia phurh emaw, rally-a tel tir pawh phal a ni lo.
2. He khapna hian naupangte chu political campaign ang chi reng reng siam nana hman thlengin a huam a. Poem, hla, hla thu chham, political party/candidate chhinchhiahna lantir, political party ngaihdan leh hlawhtlinna pholan emaw, khingpui political party/candidate sawiselna lam hawi tarlannaahte naupang tel tir a khap a ni.
Amaherawhchu, naupang chu a nu leh pa emaw, amah enkawltute'n an hruai chuan political leader bul hnaiah pawh awm mah se, political party-in inthlan campaign-na engmah a tih tir loh chuan inkaihhruaina bawhchhiatna anga ngaih a ni lo ang.
3. Dan zawmna: Political Party leh candidate zawng zawngte chu Child Labour (Prohibition and Regulation) Act, 1986, Child Labour (Prohibition and Regulation) Amendment Act, 2016 hmanga siamthat tawh chu khauh taka zawm vek tura hriattir an ni a. Commission thupek chuan Bombay High Court PIL No. 127 of 2012 (Chetan Ramlal Bhutada Vs. State of Maharashtra leh midangte) a Order August ni 4, 2014 a a siamah kum tling lote inthlan kaihhnawiha an tel loh nana political party-te'n hma an lak a tul zia a tarlang a ni.
Commission chuan inthlanna kaihhnawiha tel zawng zawngte inthlan kaihhnawih hna emaw, thiltih emaw reng rengah naupangte inrawlh tir lo turin chiang takin a hriattir a. Naupang chhawr luih chungchanga thil tih leh dan kaihhnawih zawng zawngte tha taka zawm a nih theih nan District Election Officer leh Returning Officer-te chuan mawhphurhna an neih thu a tarlang a. An thuneihna hnuaiah thupek bawhchhiat a nih chuan an chungah na taka hremna lekkawh a nih tur thu a tarlang bawk.
