Vawiin chawhma dar 10:30 khan DC Office, Keifangtlang, Champhaiah Election Commission of India (ECI) hnuaia High School leh Higher Secondary School-te tana Quiz neih dan tur relin District Level Committee-an thu khawm. Meeting hi Champhai DC Pu Vanlalngaihsaka IAS, District Election Officer (DEO) nibawk chuan a kaihruai a ni.

Election Commission of India (ECI) bultuma buatsaih tur Quiz competition hi pawl kua atanga pawl sawm pahnih zirlai kum 14 atanga 17 inkarte tana inelna tur a ni a. Champhai District chhunga School-te a tam thei ang ber tel tir turin meeting chuan hmalak a tum a. District Education Office chu a tul anga hma laa Sikul tel thei tur angte lo sawm tura tih a ni.

Quiz hi ziaka exam tur niin Sikul level (Intra School) ah neih phawt tur a ni a, Sikul tina Test Evaluating Team ruat ten Sikul aiawh tur mi pahnih an thlang chhuak dawn a. Sikul tin atanga titha thlan chhuah pahnih theuh ten Sikul aiawhin District level Competition an hmachhawn leh ang a. Heta ti thate hian District aiawhin State Level Competition  hmachhawn lehin State tin aiawh ten ECI hnuaiah National Level Semi Final an hmachhawn leh dawn a ni. ECI in quiz a buatsaih chhan chu nakin lawka vote nei mai tur zirlai naupang ten inthlan dan chungchang leh a kaihhnawihte an  hriatchian theih zawk nana ruahman a ni.

School level (Intra- School) quiz hi November ni 9, 2017 ah neih tur niin District Level competition hi November ni 17, 2017 chawhma dar 10 ah GM Higher Secondary School-ah neih tura ruahman a ni. Meeting-ah hian District level Evaluating team tur pawh ruat fel nghal a ni bawk.