MIFCO Chairman, Kolasib bialtu MLA ni bawk Pu PC Zoram Sangliana'n nimin khan Hmar Veng YMA Hall ah 14th Kolasib Inter-Office Sports Meet a khar.

Kharna inkhawmah hian Khuallian chuan thu sawiin Infiamna chu hman thiam chuan hringnuna thil tangkai tak a ni a ti a, taksa leh rilru hriselnan a pawimawh a ni a ti. In thianthatnan leh in hmelhriat that zawk nana Inter-Office Sports Meet buatsaih a ni thin chu lawmawm tiin Kolasib a Department hrang hrang hruaitute hmalakna chu fakawm a ti a, infiamna hmanga intawhkhawm chu thil zawngchhang tlak a nih thu a tarlang bawk a ni.

Infiamna chu tunlai khawvelah eizawnna a tling takzet a ni a ti a, mahni bakah chhungkaw chawm nana hmang chu Mizoram ah ngei pawh an awm fur tawh tiin zirna emaw infiamna emaw pawh ni se mi ti tak tak leh mi tumruh tan chuan hlawhtlinna kawng a awm zel a ni a ti. Hemi kawngah hian  Mizoram Sawrkar pawhin kawng hrang hranga hma a lak thu sawiin phul lem (Artificial grass) mai bakah khaw hrang hrangah Sports Indoor Stadium te an sa chho mek a ni tiin tun dinhmunah pawh Kolasib khawpui chhunga Venglai ah Kolasib mipui hman tur Multipurpose Hall sak a nih tur sawiin, a thawktu/satu tur leh a sakna tur sum pawh peihfel tep a nih tawh thu a sawi a ni. Hmar Veng Hall chu enkawl a nih danah a lungawithlak a ti a, neitu rilru pu a uluk taka enkawltu Kolasib District Badmintion Association hruaitute chungah lawmthu a sawi a, Final khel tur te chu infiammi rilru pu chunga khel tura chah in chak zawkin chak dan tawk thiama chaklo zawk pawk chaklo dan thiam turin a chah a, tha taka an khelh theihnan duhsakna a hlan bawk a ni.

He Inter-Office Sports Meet ah hian Kolasib a Department Office hrang hrangte chu Group 4 (Group A, B, C leh D) ah then an ni a, a pumpui ah Group B S.P. & Allied chu an champion a, Khuallian hian Team Champion leh Mimal lawmmawn la te hnenah lawmpuina Trophy a hlan nghal bawk a ni.