Vawiin khan Parliamentary Secretary Pu Joseph Lalhimpuia chuan Education Department a thawktute tana buatsaih ni thum awh tur Visual Production leh Editing training chu School Education Directorate Conference Hall ah a hawng.

Pu Joseph Lalhimpuia chuan zirna in hma a sawn theih nan Mizorama channel thlir hlawh ber leh rintlak, Doordarshan Kendra nen thawhhona thuthlung an ziak bawhzui nan Education a thawktuten TV programme buatsaih dan training an nei tur chu lawmawm a ti a. DDK kaltlanga Education hmalakna zau leh chipchiar zawka puanzar a nih dawn tak avangin department tan pawh darthlalang pawimawh tak a ni dawn a ni, a ti. Parliamentary Secretary chuan he programme kaltlang hian thil tak tak, belhchian dawl leh rintlak puanzar a ni dawn a, lemchan theih a ni lo, a ti a. Teacher indaihlohna hmunah pawh naupangte chhawr theih turin subject hrang hrangah mithiamte’n an zirtir ang a, zuk leh hmuam that lohziate, nundan mawi te thleng pawhin zirtir an ni ang a, zirtirtu  leh mipui mimir tan pawha hlawkthlak tura hun hman tum a ni, a ti bawk.  

DDK Programme Executive Pu Vanlaltlana Varte chuan training kalpui a nih dan tur tlangpui te sawi fiahin DDK chu mipui ta, public broadcaster a nih angin department te hmalaknaah thawhpui turin zau takin an inhawn thu a sawi a.1959 a DDK din a nih tirah a ngaih pawimawh ber leh din chhan chu Education a ni tih sawiin Education Department in an nihna tak man fuha an thawhpui chu lawmawm a tih thu a sawi a ni.

Training hawnna inkhawm School Education Department Additional Secretary Pu Lalzirmawia Chhangte kaihhruaiah hian Mizoram hmun hrang hranga he department a thawktute an tel tha hle.  School Education Director Pu B.Lalchhuanliana’n lawmthu sawiin hawnna inkhawm hi a khar a ni.