Vawiin hian Lawngtlai DC Conference Hall ah, District Election Officer Pu J. Hmingthanmawia, Standing Committee Chairman ni bawk hovin District Level Standing Committee on Electoral Rolls for General Election to Lai Autonomous District Council, 2015 member te an thukhawm a. Kan hma lawka LADC MDC General Election lo awm tura Roll buatsaih dan kalhmang an sawi ho.

Election Commission dan siam angin Member of District Council (MDC) thlanna tura Draft Roll atan MLA Roll Publication chu hman tur a ni a, MLA Roll kal lai, MDC Draft Rolls atana hman tur bik chu Election Commission in a siam dawn a ni. Draft Roll chu hman (Published) a nih hnuah Member of District Council inthlan dan buin (CCB Rules, LADC) a phut angin paih ngai paihna hun leh hming siamthatna hun neih leh tur a ni ang.

Hei hi Lai Autonomous District Council General Election a Electoral Roll kalpui dan tur a nih avangin District Election Officer Pu J. Hmingthanmawia chuan, khua leh tui dik tak ten kokim taka vote an thlak theih nan te, khua leh tui nilo Electoral Roll a luh tum te lo dan chungchangah te muang chang lutuk lova thawh a tul dawn a, Political Party leh tlawmngaipawlte thawhpuina a pawimawh thu sawiin Standing Committee awm chhan pawh chu hna thawktu atan a nih thu a sawi.

District Election Officer chuan, khaw tinah Village Level Officer dah an nih tur thu leh Village Level Standing Committee din a nih tur thu sawiin, anni thawhpuina nen Electoral Registration Officer ten Electoral Rolls an endik tur thu a sawi a, fel fai taka inthlanna a awm theih nana tih tur tul apiang theitawpa thawh zel a nih tur thu a sawi a ni.

He Standing Committee ah hian Lawngtlai District Electoral Registration Officers te bak ah Political Party zawng zawng te, Tlawmngai Pawl te leh Chanchinbumite an tel a ni.