Govt. Zirtiri Residential  Science  College zirlaiten an buatsaih  Freshers Social Cum Farewell to  Graduates  chu  Pu Lal Thanzara, Minister of  Health & Family Welfare in Vanapa Hall ah a hmanpui.

Zirlaite  tan chuan College kal lai hi  hringnun vanglai leh hun hlimawm anih avang in upat hnu pawha lung tileng  ber tute zinga mi a ni a, zirlai te chu nuam taka hlim taka hun hmang tur in khuallian Pu Lal Thanzara chuan  a chah a, chutih laiin  nuam ral lo  tur leh chhia leh tha thliar thiama rilru fim tak nena hmalam hun  thlir thiam  tur leh mahni, chhungkua, kohhran, khawtlang leh ram leh hnam tana mi chhenfakawm leh mi hmingtha ni a, mi dangte tana  malsawmna ni thei ngei tura zir chhuaka mi hlawhtling ni ngei tur in duhsakna a hlan a ni.

Thiamna  duh vang leh eizawnna avanga Mizoram pawna awm chuan hnam dangte nena inkawm ho a tul chang a awm thin, chung hunah  pawh  Mizo tihmingchhe tu leh ti hminghliau tu, inla changkanga Mizo hnam hmusita nuihzattu ni lo turin Minister chuan zirlaite chu chah in khawi hmunah pawh Mizo kan nihna chawinunga  heng kan hnam Lam, Ipte chei leh Mizo Puante chhawmnung zel in Zo Zan kan hman thinte uar deuh deuh  in College kal theih nana enkawltu  nu leh pa leh chhungte bakah  zirtirtute zah nachang hria a an thu  awih in  thiante tana thiantha ni turin a fuih nghal bawk a ni.

Zirlaite an fail avanga zirna an chhunzawm mai lo thin chu a dawihzepthlak  a, beidawn mai loh tur tiin khuallian Pu Thanzara  chuan  kan sun mek India President lo ni tawh Dr. APJ Abdul Kalama nundan entawntlak  leh ngainatawm a nihzia sawiin  zirlaite chu an nun hman mek uluk a, ruihtheih thil laka fihlimin midang harsa zawk leh tanpui ngaite  puih nachang hre tur leh  hlawhtling  ngei tura zirchhuak tura fuih in duhsakna a hlan.

Zirtiri College naupang te hian Pu Lal Thanzara hnenah hian  lawmthu sawina leh chawimawina thuziak (Citation) leh thilpek an hlan a ni. Chawhnu lamah pawh programme hi chhunzawm zel in  thusawi leh special items  hrang hrang ten en hun hman a ni.