759/2026-2027

Aizawl the 29th May, 2026: School Education Minister Dr. Vanlalthlana chuan vawiin khan Government Comprehensive Model School, Model Veng, Aizawl-ah Northeast-a a hmasa ber ni turin “New Age Tech Skills Centre” chu a hawng.

He centre hi Bharat Forge Ltd. CSR (Corporate Social Responsibility) atanga din a ni a. Bharat Forge Ltd. hi forging leh defence siamchhuah lama khawvel hriat hlawh an ni. Project technical partner chu SimuSoft Technologies a ni a, anni hian centre siamremna, training leh curriculum buatsaih lamah hma an la a. School Education Department, Government of Mizoram nen tangkawpin kalpui a ni. He project hi June 2025-a Aizawla Confederation of Indian Industry leh CSR Cell, Government of Mizoram te’n an buatsaih CSR workshop atanga lo intan a ni.

New Age Tech Skills Centre hi Mizoram leh Northeast pumpuiah school level-a technology skills lab hmasa ber a ni a. Bharat Forge CSR support leh SimuSoft Technologies technical expertise hmangin zirlaite chuan Artificial Intelligence (AI), Robotics, Internet of Things (IoT), 3D Printing, CAD, CNC Simulation leh Drone Technology ang chi technology tharte an zir dawn a ni.

He hmalakna hi National Education Policy (NEP) 2020 thiltum tihpuitlinna atan classroom-a zirna leh industry-relevant practical technical education inkara inthlunzawmna pawimawh tak a ni a. SimuSoft Technologies chuan school zirlaite atan AI curriculum leh textbook bik pawh an siam a, chu lehkhabute pawh chu programme-ah hian tlangzarh a ni bawk.

Programme-ah hian centre hawnna neih niin AI, robotics, IoT leh simulation technology a taka entir (live demonstration) neih nghal a ni bawk.

Programme-ah hian mi pawimawh tam tak an tel a. Dr. Vanlalthlana chu khuallian niin Dr. Leena Deshpande chu Khual Zahawm a ni. School Education Secretary Pu David Lalthantluanga chu Special Guest a ni a. Programme hi Pi Angela Zothanpuii, Director of School Education-in a kaihruai a. Technical institution hrang hrang aiawhte pawh an tel a ni.