758/2026-2027

Thingsulthliah the 29th May, 2026: Prof.Lalnilawma chuan HSSLC Pass chhuak te chu zirna sang zawk leh khawvel zau zawk hmachhawn tura an rilru leh taksa buatsaih turin a fuih a. Hlawhtling turin Pathian tihna nen rinawmna, thawhrimna, tawrhchhelna leh tih hram hramna nun neih a pawimawh a ni, a ti.An thiamna leh finna te Mizoram ram leh hnam, khawtlang hmasawnna atana hlan let ve tura fuihin, chu chu an mawhphurhna a ni tih hre reng turin Minister chuan fuih a. Mizoram mai bakah, India ram emaw khawvel ram zau zawkah zirna chhunzawm emaw hnathawk tur pawhin an la kal ang a, chung hunah chuan harsatna te leh beidawn duh rum rumna te pawh an la tawk thei tih hre tur leh, Pathian chakna rinchhan chungin, tawrhchelna, rinawmna, tumruhna , beidawn duh lohna leh tih hram hramna nun nei turin a fuih a ni.

Minister chuan zirlaite hlawhtlinna bul chu nu leh pa mai bakah Zirtirtute thuawi hi a ni, a ti a. Mizo nun ze mawi - tlawmngaihna leh aia upa zah hi chu nunpui thar zel turin a fuih a ni. Thawhhreh nei lo tura fuihin, rinawm tak leh taima taka an thawh phawt chuan Pathianin mal a sawm zel ang tiin zirlai kalkhawm te Prof Lalnilawma chuan a fuih a ni.

Thingsulthliah HSS atang hian HSSLC result hnuhnung berah zirlai candidate 58 neiin, pass parcentage 96.5 an nei a ni.

Thingsulthliah Higher Secondary school hi kum 2004 ah khawtlangin an din a, kum 2008 khan lumpsump ah awmin, tunah hian Sawrkarin Special Category 2 ah hlankai a ni. Tunah hian Zirlai naupang 156 nei mekin, Teaching Staff 11, Office Assistant 1 leh Neilit Staff 1 thawktu an awm mek.Khaw thum VC heng, Thingsulthliah, Seling leh Thingsul-Tlangnuam te’n lungrual taka din niin, he Sikul ah hian Thingsulthliah, Seling leh Tlangnuam mai bakah Sesawng , CTI, Mualmam leh Thingtlang khaw dang atangin kumtin zirlai an nei thin a ni.