757/2026-2027

29th May, 2026: Kumin World No Tobacco Day May ni 31, Pathinni (Sunday)- a a tlak avangin Mizoramah chuan vawiin khan hman a ni a. World No Tobacco Day ah hian World Health Organization (WHO) theme thlan chu “Unmasking the appeal – countering nicotine and tobacco addiction” tih a ni. He hun hi National Tobacco Control Programme Mizoram te buatsaihin District hrang hrangah hman a ni.

World No Tobacco Day hi Aizawl-ah chuan DHME Auditorium ah hman a ni a, he hun hi Dr. R. Lalchhuanawma, Mission Director, National Health Mission, Mizoram chuan kaihhruaiin, thawktute chu Health care providers (Doctor, nurse, HW etc) kan nih angin mahni fihlim thei ila, Health facility te 100% tobacco Free ni zel thei se, Home visit etc kan neih thin na ah te zirtirna uar zel ila, Generation thar (Tobacco Free) kan neih theihna turin tan lak a pawimawh, a ti.

Pu R. Lalremruata, State Consultant, NTCP chuan WNTD theme hmangin presentation a pe a, Health Dept-a thawktu te, Teachers, Dan kengkawhtu te leh Ngo pawl hrang hrangah Zuk leh hmuam that loh zia inzirtirna training vawi 107 buatsaih tawh niin Awareness Programme School leh Institution hrang hrangah vawi 204 nei tawh a ni a, meizuk phallohna hmuna meizu mi 7580 man an nih thaw thu a sawi a. E-Cigarette (Vape) chi hrang hrang leh hriselna atana a that loh zia a sawi bawk.

Dr. Zoramthangi Renthlei, State Nodal Officer, NTCP chuan pledge (vaihlo zuk leh hmuam dona lam) kaihhruai a. ISTHM President Pu VL Vela’n thu a sawi a ni.

WHO tarlan danin tobacco industry lam hian thangthar ten vaihlo zuk leh hmuam an hman nachang an hriat theih nan chin dan thar tam tak a rawn chhawp chhuak thin a, hemi laka thangtharte venhim hi a pawimawh tak zet a ni. Kum engemawti atang khan khawvelin vaihlo zuk leh hmuam thatlohna a hria a, a buaipui chhoh atangin vaihlo zuk leh hmuam siamchhuaktute hian thangthar zawk te hip nan leh tihchhin an chak nan a tuamna thlengin mit la thei tur te in an buatsaih ta a. Hemi bakah hian flavor hrang hrangte a siam a ching chho ta a, hei hian thangthar te a hip thei a; nu leh pa ten an fate fihlim tur a hrilh ngun a pawimawh tak zet a ni.

Mizoramah chuan mouth freshner tiin Shikhar ei ching thalai te zingah an tam hle a. Shikhar hian bawm hran pawlh tur a chhawm a, hei hi vaihlo a ni a, a pawlh tello hi chuan an ei tha peih hlawm meuh lo. Vaihlo ah hian nicotine a tel avangin ngaih (addict) a awlsam em em a, hman tawh chuan bansan leh mai a har em em a,tihchhin loh \a him ber. Tunlai khawvelah meizuk bansan nan tiin Electronic Cigarette (E-Cigarette)/Vapes te an siamchhuak a he thilah hian nicotine tello tiin flavor hrang hrang an rawn siamchhuak a, thangtharte zuk leh hmuam hman tanna kailawn a ni thei a ni. Mizoram ngeiah pawh hmang an tam ta em em a. Heng E-cigarette/Vapes te hi Prohibition of Electronic Cigarette Act 2019 hnuaiah India ram pumah zawrh chhuah, sem darh, lakluh etc. khap tlat a ni a; lo zuar ru an awm chuan dan bawhchhia an ni a hrem theih an ni. Vaihlo zuk leh hmuam te hi eng ang pawh a tuam mawi pawh nise hriselna atan a tha lo tih inzirtir uar a tul hle.