2174/2026-2027

11th September, 2026: Nimin khan School Education Minister Dr Vanlalthlana chuan Gandhinagar-a Vidya Samiksha Kendra (VSK)-a tlawh a, Gujarat sawrkara Education Department hotute nen an inkawm.

VSK hi Gujarat sawrkarin zirna in, zirtirtu leh zirlaite vil nan leh tihhmasawnna atana a kalpui a ni a. India rama a hmasa ber niin hlawhtling taka kalpui a ni. State hrang hrangah hman ve mek niin School Education Minister leh Samagra Shiksha official-ten Mizoram VSK tihchangtlun a nih theih nan a taka kalpui a nih dan an zir chiang a ni.

Minister Dr Vanlalthlana chuan thu sawiin, Mizoramah pawh sawrkarin zirna leh technology thlung zawmin, theihtawpa hma an lak thu a sawi a. India rama VSK hmanga sulsutu Gujarat tih dan ṭha awm te chu Mizorama hman a nih ve theih a beisei thu sawiin, Gujarat sawrkarin zirna kawnga hmalakna ṭha a neihte pawh Mizoram mila her rem theih a nih thu a sawi bawk. Gujarat Education Department hotute pawhin Mizoram tih dan ṭhate chu entawn an tum thu an tar lang.

Hemi ni vek hian Higher & Technical Education Minister ni bawk Dr Vanlalthlana chuan New Age Makers' Institute of Technology (NAMTECH), Gandhinagar a tlawh a. NAMTECH hotute nen inkawmin, hun rei lo tea class kalpui ṭan mai tur Mizoram Engineering College (MEC) chuan tun lai mil zirna a kalpui theih nan leh, MEC aṭanga zir chhuakten industry mamawh thiamna an zir chhuah nghal theih nan NAMTECH chu thawhpui turin a sawm a. NAMTECH hotute chuan State Minister-in a tlawh chu lawmawm an tih thu sawiin, an theihna zawna Mizoram sawrkar nen thawk ho tura an inhawn reng thu an sawi a ni.

Gandhinagar a cham chhung hian Minister Dr Vanlalthlana hian IIT Gandhinagar-a Mizo awmte tlawhin inkawmna hun an nei bawk a ni.