987/2023-2024

Vawiin khan Saitual DC buatsaihin Govt. Saitual College Auditorium-ah Remna Ni vawi 37-na hman a ni a, School Education Minister Pu Lalchhandama Ralte chuan khuallian niin he hun hi a hmanpui.

Minister chuan he hunah hian thusawiin Mizoramin remna a neih chu remna tluantling a ni a, ram ralmuang ber a ni thei hi a hlutzia mipuiin an hriat thar a ngai a, Mizoram țhenawm buaina hi remna hlutzia hriat thar leh nan i hmang ang u a ti. Minister chuan remna vawng nunga tizahawm zel tur te, rambuai lai politics sawi nikhuaah pawh hnam sipaite zahawmna vawng nung zawnga sawi a pawimawh thu a sawi.

Thu a sawi zelnaah, Mizoramin remna a neih theihna atan hian fakawm tak tak mi pathum an awm tih sawiin Minister chuan hnam movement kengtu Pu Laldenga'n Mizo mipuite auhna chhanga  inremna a awm theih nan state nihna pawm theia, a bo a bang awm lova hnam sipaite ralthuam nen a rawn chhuahpui vek kha a ropui hle a ni a ti a. Inremna a awm theih nana lalthutthleng kiantu khatih laia Chief Minister Pu Lalthanhawla a fakawm em em bawk a, a thutthleng kian duh lo se, inremna a khawtlai vek thei, a inpekna a fakawm hle a ti a. Pu Lalduhoma khatih laia MP khan Inremna kalpui hna  muang deuh kha inremna a awm thuai theih nan theih tawp a chhuah a, London thlengin a kal hial a, a fakawm hle a ni a ti bawk. Minister chuan heng mite 3 hi party hrang țheuha awm ni mahse, party sawi lovin remna atana an thawhna a fakawm hle a ni a ti.

Minister chuan Mizoram remna chu a hlawhtlin em avangin central sorkarin kan Chief Minister Pu Zoramthanga chu India hmarchhak leh south east Asia-a remna a awm theih nan palaiah a hmang țhin a, a chhuanawm hle a ni a ti.

Minister Pu Lalchhandama Ralte chuan inremna avangin India Danpui 371G chu ziah țhat hial a ni a. Mizote sakhua vawnhim a nih theihna turte, ram leilung neitu a nihna te ziahlan a nih bakah Mizo Customary Law te pawh hmanzui tura ziah a ni a ti bawk. Remna Ni-ah hian remna a hlutzia hre thar tura mipuite chahin, Pu Lalchhandama Ralte hian Remna Ni pualin thing a phun nghal bawk.

Saituala Remna Ni hmanna inkhawm Saitual DC Dr. Lalngura Tlau-in a kaihhruaiah hian Remna Ni puala School Education Department-in an buatsaih District Level Quiz Competition leh Essay competition a tițhate hnenah lawmman sem a ni a, sub-Hqrs YMA cultural Troupe ten cheraw an kân bawk.

Remna Ni lawmnaah hian Saitual District DC, SP leh officer pawimawh te, tlawmngai pawl hruaitute, khawtlang hruaitute leh political  party hruaitute an tel a ni.