986/2023-2024

Mamit 30th June, 2023 : Pu Lalrinliana Sailo, Hon'ble Speaker, Mizoram chuan vawiin khan Chhimveng YMA Hall, Mamit-a Remna Ni-2023 khuallian niin a hmanpui.

Khuallian chuan remna leh muanna a awm loh chuan hmasawnna a awm theilo a ni tih chu kan hruaitu hmasate rilru a nih avangin Mizoramin remna leh muanna a hmuh theih nan theihtawp an lo chhuah a, kan ram leh hnam tana pasaltha martar te kan theihnghilh lova, kan hrerengin, zahna chibai kan buk a ni a ti. Mizoram chu kan thenawm State-te pawhin an ngaihlut thin nachhan chu, remna leh muanna kan neih theih nana, Kohhran leh NGO te ngenna hnam pasalthate'n zahsak a, an ngam loh vang leh an hneh loh vang ni lova remna leh muanna a awmna tura an tlawm ngamna hi a ni a ti. Kan thenawm State te nen inrem tlang taka kan awm theih nana kan Chief Minister zahawm tak hmalakna chu hmuh hmaih rual a ni lo a, remna leh muanna ramin a neih chu zoram mipuite tanrualna leh thawhhona tha tak vang a ni a ti.

Speaker chuan zalenna tluantling kan neih nana sulsutu hmasa hnam pasalthate kan zaha kan hriatreng a tul hle a, kan ram chu thang leh thar zelte tan pawha chenna tlak, mipui rilru dik, kan sukthlek leh thlir dante pawh her rema hmasawnna kal mekte hmu thiam a, zoram nuam siam zel turin kalkhawmte a chah a ni.

He hun khualzahawm ni-a hmanpuitu Er. H. Lalzirliana, Mamit bialtu MLA, Vice Chairman, Road & Infrastructure Development Board chuan Remna Ni lawm tura kalkhawmte chibai bukin remna hi a hlu a, remna kan neih theih nana theihtawpchhuahtute leh Martar te kan hrereng a ni tiin Remna chu MNF ta bik leh Mizo ta bik a ni lova, Mizoram chhunga khawsa zawng zawng tan a ni a ti.

Kan ram chu a buai hunlaiin India ram State zinga ram buai ber ni mahse tunah chuan ram ralmuang ber a ni mek a. Chutihrualin, Remna kan neih Kum 37 hnuah pawh kan la hnufual hle a, nasa taka hmasawn turin kan beih a tul a. A bik takin Mamit District chu zirna lamah kan la thawhhlawk lo hle a. Central Service leh Mizoram Service-ah pawh inziak tling kan la tam lo hle a. Kan District hmasawn zel nan thahnemngai lehzuala zirna kan tuichilh a ngai a ni tiin Pathianin kan hmel, kan nihna leh kan sum neih leh neih lohah min teh dawn lova. Rinawm leh thahnemngai takin kan hna theuhte kan thawk em tih chu min tehna tur avangin kalkhawmte chu thahnemngai taka kan hna theuhte thawk turin a chah bawk a ni.

He hunah hian Pu Rodingluaia, Jt. VC Chairman leh Pu Vanlalchhuanga Chhangte, President, Sub Hqrs YMA, Mamit te'n thu an sawi bawk.

Vawiin Programme-ah hian Remna Ni lawmna puala Painting Competition, Open Photography Competition, High School Level Quiz Competition leh Higher Level Essay Writing Competition lawmman semna neih nghal a ni.

Vawiin Remna Ni pual hian Free Health Camp neih niin Health Camp a sem tur damdawite hi Er. H. Lalzirliana, Mamit bialtu MLA chuan a tum vek a. Remna Ni pual vek hian nimin khan Thingphun hnatlang leh Blood Donation Camp neih niin tukin khan Peace Walk neih a ni bawk a. Khuallian Speaker hian Tourist Lodge Mamit-ah Remna Ni 2023 hriatreng nan thingtiak a phun bawk a ni.

Remna Ni lawmna hun hi Pu V. L. Remliana, Mamit District Bawrhsap-in kaihruaiin Pi Lalzamliani Khiangte, President, Sub Hqrs. MHIP, Mamit chuan lawmthu sawina a nei a ni.