985/2023-2024

Dated Serchhip, the 30th June, 2023: Vawiin khan Remna Ni 2023 chu Serchhip DC Conference Hall ah a lawmna hun buatsaih a ni a, Er. Lalrinawma, Minister, AH & Vety, SW & TA, etc., chu khuallian a ni.

Khuallian chuan, India in zalenna a hmuh lai vel khan keini Mizote pawh kawng pengthuamah kan ding a, khatihlaia kan ram hruaitute khan khawi lam kawng nge zawh tur ni ang tiin an ngaihtuah nasa em em mai a. Aizawl thuttu bawrhsapte nena relin India ramah kum sawm chhung atan bet ve phawt mai ila, kum sawm hnuah kan ennawn dawn nia an ti a, mi sawmngaten hming ziakin an titlu ta a ni. Pathian hian hnam tinte hi min dina, ram leh ziarang min pe hlawm a, mahni hnam rilru pu lote hnenah rorelna pawh a pe ngai meuh lo, India in zalenna a hmuh lai vela kan ram hruaitute pawh khan an theihtawp an chhuah a ni. Tichuan kum sawmhnih a lo nih chuan Pathianin Pu Laldenga a rawn din chhuahtir a, kan ramah hnamthlipui a lo tleh ta a, zalenna kan sual a, hnam hmangaihna thinlung dik tak kan pu ta hlawm a ni. Vawiinah hmasawnna hrang hrang kan hmu chho zel a, kan ram ngei pawh International Highway in a paltlang dawn, hetiang hmasawnna lo awm chho zel laka kan ram leh hnam humhimna tur awm chhun chu hnama chiang leh harh, nationalism thinlung chauh hi a ni, tiin rambuai vanga Mizotea hnama chianna leh hmangaihna dik lo awm dan leh chumi hlutzia chu a tarlang a. Rambuai kha kan tuar thlawn lo a ni, a ti. Kan inremna thu chuan kan sakhua leh hnamzia humhim tura thuneihna min pe a, Parliament ah lo pass pawh ni se kan sakhua leh hnam thuah engmah min barhlui ngawt thei lo. Vawiinah Uniform Civil Code sawi rik ni mahse kan tan hlauh tur engmah a awm lo a ni. Hetianga invenhimna tha tak kan neih chhan hi Remna thuthlung vang a ni a, University, India rama a tha ber pawl kan neih chhan te, High Court kan neih chhan te, Inner Line Permit hmanga ven kan nih dan te, Special Category kan nih chhan te, kan in leh lo leh ram, hnam dangte hnena kan hralh theih loh chhan te uluk taka kan ngaihtuah chuan Remna thuthlung vang zel a lo ni a, Remna zar kan zo nasatzia leh kan himna a nihzia a chiang em em mai a ni, a ti. Remna boruak hlu tak hi kan ram leh hnam hian tangkai taka kan hman theih nan mitinin mahni zawnah theuh theihtawpin hna i thawk teh ang u, tiin mipuite a sawm a ni.

He hun hi Pu K. Saitluanga, Deputy Director, I&PR in a kaihruai a, Rev. VL. Nithanga, BCM chuan hunserh hmangin Pu James Lalnithanga, Addl. DC chuan Remna Ni puala Serchhipa hun hman dan tlangpui a tarlang a ni. Remna Ni pual hian Thisen pek runpui buatsaih niin unit 72 pek a ni a, Health Camp Buangpui khuaah buatsaih niin, High School zirlaite puala Quiz inelna te, Higher Secondary School zirlaite puala Essay competition te buatsaih a ni. State Level Quiz hi Aizawlah buatsaih a ni bawk a, hetah hian Serchhip atanga tel JL High School te chuan lawmman pathumna an dawng nghe nghe. Remna Ni pual vek hian Serchhip VC leh YMA ten faina hnatlangpui an buatsaih a, Jt. VC leh Sub Headquarters YMA ten thingphun hnatlang neiin, tukinah khan Peace Walk buatsaih a ni bawk a, vawiin a lawmna pui ber hmanaah hian I&PR department chuan Photo Exhibition buatsaihin thlalak 62 an pho chhuak bawk.

Vawiin a lawmnaah hian Pu K. Lalrinchhana, Asst. Professor, Govt. Serchhip College chuan “Remna Ni lo awm chhan leh a pawimawhna” tih thupui hmangin thusawina hun a hmang a, Serchhip Joint NGO Coordination aiawh leh PAMRA Serchhip district aiawh ten thusawina hun an hmang bawk. Tin, Remna Ni puala intihsiakna lawmman hrang hrang te he hunah hian an sem nghal a ni.