School Education Minister Pu Lalsawta chuan vawiin chawhma dar 10:30 khan Helen Lowry HSS Auditorium ah an 18th Graduation Commencement Service a hmanpui.

Minister chuan zirlai leh nu leh pa kalkhawmte hmaah thusawiin HSLC leh HSSLC Examnaa an School hlawhtlinna chu zirlaite, zirtirtute leh nu leh pa te tanrualna rah a ni, a ti a, an hlawhtlinna ah lawmpuina a hlan. Tunhmaa hna a tam angin tunlai hunah a ni tawh lova, lehkhathiam hmu lo an tam ta em em chu kan zir dan phung her danglam a tul tawh a ni tih hriain Sorkar chuan khawi hmunah pawh hman theih thiamna chhawr tlak zirlai ten an puakchhuah theih nan hma lak mek a nih thu a tarlang a. Khawvel ram changkang zawkah pawh Mizo hna sang tak tak thawk an awm mek chuan Mizo te chu hnam dangte aia kan hniam bik loh zia a tarlang a ni tiin Minister chuan ram dangte anga resources nei ve lo mah ila, kan thiamna leh theihna hmang hian khawvel hriatah kan inpho chhuak thei a ni, a ti bawk. Chumi tihhlawhtling tura zirna tha leh tluantling zawk a awm theih nan Sorkar chuan zirtirtu ah pawh duhsak bik awm miah lovin a thiam thiam chauh lak an nih zel tawh thu a sawifiah a, kum tam tak duhsak zawngte inlaa kan lo kalpui thin chuan kan ram zirna a tihchhiat mek thu sawiin hetianga hma lak a nih avang hian harsatna te pawh an tawh thin thu a tarlang bawk. Zoram tana tha ni-a a hriatah chuan Sorkar chu nghet takin a kal zel dawn a ni, Minister chuan a ti.

Helen Lowry HSS Principal Pi Thangzovi Fanai chuan Report pe-in Helen Lowry School chu Missionary ten 1950-a an lo din a nih thu leh tunah zirtirtu leh staff 77 enkawlna hnuaiah zirlai 1528 an awm mek thu a sawi lang bawk.

Minister hi ZENICS Chairman Pu Ronald Sapa Tlau leh School Education Joint Director Pu J.H.Lalbiakmawia ten an tawiawm bawk a ni.