Vawiin khan Commissionerate of Excise & Narcotics Building sak zawh thar chu Excise Minister Pu J.H.Rothuama’n a hawng a, Parliamentary Secretary Col.Z.S. Zuala chu Khual Zahawm niin DM&R Minister Pu Nihar Kanti Chakma leh State Planning Board Vice-Chairman Pu Lalkhama te pawhin hawnna hun hi an hmanpui a ni.

He office building thar lawmna inkhawm Excise & Narcotics Secretary Pu H.L. Rochungnunga kaihhruaiah Khuallian Pu J.H. Rothuama chuan Excise Department chu Department langsar leh mite ngaihven hlawh tak a nih avangin a hnathawk te chuan Department ti mawi tura tanlak zel a pawimawh a ni, a ti. Vawiina ‘Excise Inpui’ thar hawn tak chuan Excise Department-a thawk zawng zawngte tan fuihna thar nise, Mizoram mipui zawng zawngte tan boruak tha leh thlamuan thlak tak siam hna chu an mawhphurhna a ni tih hria a mite fak hlawh leh zual turin theihtawp chhuah turin a chah bawk. Mizoram chu ram dang nen a inrina lai a nih avangin zu, ruihtheihthil dang leh Danin a phalh loh damdawi chi hrang hrang tawlhrukna kawng a ni thin tih hriain sorkar laipui pawhin a ngaimawh hle a, Mizoram Excise-te kut ti chak turin hma a rawn la mek zel laiin Mizoram Excise Department, tlawmngai pawl leh mipuiten hemi venna kawnga thla kan thlah thei lo, a ti. Excise Building thar sak a nih theih nana sum ruahman saktu State Planning Board chungah lawmthu a sawi bawk a ni.

Khual Zahawm Col.Z.S. Zuala chuan MLTP Act a awm emaw a awm lo emaw Excise & Narcotics Department hnathawh hi a pawimawh berte zinga mi a ni reng dawn a, hmasawnna lo kal zelah pawh mawhphurhna sang zawk an ken dawn avangin Excise hnathawk zawng zawngte tan la sauh sauh turin a chah a. Col.Z.S. Zuala hian Excise Department website thar excise.mizoram.gov.in/ a hawng nghal bawk a ni.

Commissionerate of Excise & Narcotics Office Building thar hi Aijal Club bul (State Bank hlui awmna thin) ah a awm a. A hmun hi Department-in kum 1996 khan lei tawh mahse sum harsatna avangin kumin khan sak zawh fel chauh a ni. MPWD aiawha technical report petu Er. Bowman chuan building sak tan hna hi kum 2005 khan tan a nih tawh thu leh cheng nuai 156.53 senga sak zawh fel a nih thu a tarlang a. He Building-ah hian Excise officers & Staff te thutna room hrang hrang bakah Armoury Store, Driver’s Room, Parking, Malkhana, Lock-up (Mipa & Hmeichhia), Uniform Store Room, Malkha Strong Room, Bedroom pakhat, W.T. Room leh Conference Hall te a awm a ni.

Vawiin Excise Building thar hawnna inkhawm-ah hian ATC Principal Rev. Dr. Vanlalchhuanawma’n hunserh a hmang a. Excise & Narcotics Commissioner Pu Lalbiakmawia Khiangte-in lawmthu sawina hun hmangin hun a khar a ni.