NSS State Level Advisory Committee Meeting vawi 11-na chu an Chairman Pu Zodintluanga, Sports Miniser hovin a pisa-ah vawiin khan neih a ni.

Meeting kaihruaitu Sports Minister Pu Zodintluanga chuan zirna sikul leh college kal laia NSS hmanga zirlaiten vantlang leh an mihringpuite tana tangkai tur an zir leh thawh zawng zawng te chu an puitlin hnuah a taka hmang tangkai thiam, khua leh tui tha an nih ngei a beisei thu a sawi a ni.

Meeting-ah hian kum kalta 2012-2013 chhunga NSS te tha thawh chi hrang hrang an thlirlet a, 2013-2014 chhunga an hmachhawp te, NSS North East Festival Mizoramin a dawn tur leh thil pawimawh dangte an sawiho a ni. 2012-2013 chhung khan NSS Volunteer mipa 12549, hmeichhia 10551, an vaiin 23100 an awm a. Mizoram hmun hrang hranga College 25 leh Higher Secondary School 50 -ah NSS Unit 144 a awm a ni. Zun in, vantlang tuisemna hmun, chawlhbuk, damdawiin thuthleng, bual in, pavilion leh vantlang mamawh thil dang engemawzat an siam bakah thing phun hna, vantlang hmun tihfai hna, kawng siamthat hna, thisen pek leh mipui hrilh bengvarna, awareness campaign vawi duai lo an buatsaih bawk.

Thlichhia leh ruahpui avanga chhiat tawk tanpui ngai an awm thulah pawh NSS Volunteer te chu thawkchhuak mai thei tura lo inralring turin a ngen nghal bawk.

Meeting-ah hian DM&R Principal Secretary Pu PC Lallawmsanga leh Sports Secretary Pu R Lalvena te leh mi pawimawh dang te an tel.