Laipuitlanga chhiatna thleng a mitthi ruang te chu lakchhuah kim a ni ta a, ruang lakchhuah hnuhnung ber pahnih Thingfal khua Pi.Lalremchhungi leh Vanlalrema Hnamte te chu BCM Laipuitlang Kohhran Biak In ah thlahna hun hmanpui an nih hnu ah bialtu MLA S.Laldingliana, Parliamentary Secretary hovin Lunglei  panpui an ni.

15.5.2013 zing dar 6:00 ah Pu.S.Laldingliana Parliamentary Secretary In Chanmari Lunglei ah chawlhpui niin ruang lak chhuah hnuhnung ber Vanlalrema Hnamte Aizawl a Postmortem hman takloh chu Civil Hospital Lunglei ah Postmortem a nih hnuah ruang te hi an khua Thingfal panpui niin nimin chhun dar 12:05 khan Thingfal thlenpui an ni.

Ruangte hi khawtin deuhthaw ah YMA leh mitlawmngai ten an lo hmuak a.May ni 15 khan Pi Lalremchhungi leh Vanlalrema Hnamte te chu Rev. V.Lalthlamuana'n ropui takin a vui liam a ni. Thingfal khuaa he chhiatna thlenga boral ta mi 6 te ralna Rs.150000/- theuh chu sorkar aiawhin Pu.S.Laldingliana hian a hlan a, hliam te enkawlna tur pawh pek thuai tura sorkarin ruahmanna a kalpui mek thu a sawi bawk.