Vawiin khan Higher Secondary School Lecturers Association of Mizoram (HISSLAM) Annual Assembly vawi 21-na Aizawl a Synod Conference Centre neih a ni a, School Education Minister Pu Lalchhandama Ralte chuan khuallian niin a hmanpui.

Higher Secondary School zirtirtu kalkhawm hmaah thu sawiin Education Minister chuan All India Level ah Mizote hi kan hniam bik tur a ni lova, hnamdang aiin kan hniam lo, kan ti ve thei a ni tih hi zirlaite thinlungah tuh a ngai a ti a. Zirtirtuten zirlaite hnenah Mizo Nationalism te, Mizo nun ze mawi aia upa zah te, mitin inngaih pawimawh te, kan chhiat thata in puih tawn te kan hnam nihphungah a pawimawh avangin zirlaite rilruah tuh ngheh a ngai a ni a ti.

Minister chuan kan Kristianna vawng nunga Pathiana innghah hi dinchhuahna a ni tih zirlaiten an hriat reng theih nan zirtirtuten an hrilh thin a tul a ni a ti. Zirtirtu kalkhawm te chu an hnaah missionary thinlung pu a hun vawng dik turte, smart taka zirtirna pe tur te, tun hma aia zirlaite chuan hma an sawn tawh avangin  mahni in update reng turte in a fuih a. Kan ram zirna atan puanven sawi chhing sauh sauh turin a sawm a ni.

HISSLAM President Pu Vanlalzuata pawhin thu a sawi a, an enkawl zirlaite chu an kawng zawh tur lama kaihhruainaah Higher Secondary School chu dinhmun pawimawh taka ding an nih avangin sorkarin a tihchak tul a tih thu a sawi a, competitive exam hrang hranga Mizo zirlaite tun aia an san theih nan tih chak an ngai hle tih a sawi bawk.

HISSLAM Annual Assembly hi Pu C.Laldinliana Vice President HISSLAM in a kaihruai a, an pawl hmalakna report Pu V.Vungliana Gen. Secretary in a pe a. An member 4 superannuation pension a chhuak te an thlah bawk. Aizawl khawpui chhunga an member te leh thingtlang hmun hrang hrang atangin member te an kalkhawm a ni.