Nimin tlai khan School Education Minister Pu Lalchhandama Ralte chuan Govt Zemabawk Higher Secondary School Building thar a hawng.

 Minister chuan he hunah hian thusawiin Mizoram sorkarin zirna a ngai pawimawh a, ngaih pawimawh tur dik a ngai pawimawh a ni a ti. Hmasawnna hna dang te chu pawimawh hle mahse, zirna a that loh chuan hmasawnna dangin awmzia a nei thei tak tak lova, zirna hian a lailum a chan a ngai a ni a ti. Khawtlang pawhin zirna hi hmun laili pe ila, zirna compound zahawmna te, zirlaite zahawmna te vawnpui ila, exam laiin zirlaite tibuai thei thawm bengchheng siam loh a pawimawh a ni a ti bawk. Khawtlang hruaitute pawhin zirtirtute dinhmun te, naupangten an chanvo an chang em tih te lo thlithlai a pawimawh a ni a ti bawk.Central service a awm mek Mizote an hun a liam mek tih sawiin , an hmun luah thei turin zirlaite chu puanven sawi chhing turin a sawm a ni.

 Zemabawk Higher Secondary School building sak  thar hi a dung 60ft, a vang 24ft a ni a, cheng nuai 30 senga sak a ni a, Lushai Engineer ten an sa a, classroom indaih lohna phuhruk nan an hmang dawn a ni.

Zemabawk Higher Secondary School ah hian zirlai 380 an awm a, High School ah 270 an awm mek a ni. Thawktu mi 51 an awm mek a, kumintin High school leh Higher secondary school ah naupang admit sen loh an awm reng tih an school Principal chuan a sawi.