Khuallian chuan SARAS Fair buatsaih thin chu Sawrkar laipuia Ministry of Rural Development hmalakna pakhat thingtlanga chengte thil siam chhuah pholanna leh chawisanna tura duan hun pawimawh tak a ni a, India ram pum ang pawhin ngaihhlut a hlawh hle tawh a, he hun hlu tak chhim tur hian India ram mai bakah ram pawn lam atang te thleng pawhin mi tam tak an lo kalkhawm thin a ni, a ti a. SARAS Fair hian India hnampa Pu Mahatma Gandhi suangtuah leh duhthusam –Kan ram thar leh siamchhuahte chauh tihhmasawn leh hman tangkai a tul zia a rawn pholang chiang hle a ni, a ti bawk. Minister chuan SARAFS Fair 2019 Champhai khawpui nuam taka huaihawt ani thei chu lawmawm a tih thu leh inhmeh a tih thu a sawi a. Tun hma atang tawha hnathawh leh sumdawn kawnga khaw hmahruaitu pawimawh tak anih vawng nung zelin, taihmakna leh thawhrimna vangin tun dinhmunah Mizorama khaw hmasawn leh thang chak ber pawl a nih thu a sawi a. I&PR leh Revenue Department changtu nibawk chuan Champhai leh Kolasib a FM Station bun anih thiehna tura I&B Ministry lam dawr anih thu leh SEDP hnuaiah ram neilote ten eizawnna ngelnghet an neih theihna tura ram ngaihtuahsak tuma hmachhawp neih anih thu pawh a tarlang a. Mizote chu hotute thu ngaichang thiam leh a huhova hnathawk thiam tak kan nih thu tarlangin, Self Help Group (SHG) dina intelkhawm kan thiam thu sawiin, thawhhona rah chu hmasawnna dang ang lo takin a lang nghal mai thin loh avangin member-tin ten thawhhona tha, rinawmna, beih hram hramna, tumruhna leh taimakna vawn tlat a tul a ni, a ti a. RD Department hnuaia SHG member-te theihna hai chhuak tura SARAS FAIR buatsaih a ni hi lawmawm a tih thu sawiin, he fair hian member zawng zawng te thinlungah hmasawnna hlun leh ngelnghet zawk a tuha chona leh phurna nasa zawk a pek ngei a beisei thu a sawi bawk.
Khuallian chuan Sawrkar laipui ngaihpawimah tak SARAS Fair chu Mizoramm sawrkar pawhin a ngaipawimaha, SHG ten harsatna an tawh chang pawhin puih a inhuam reng thu a sawi a. SHG rintlak taka kalpui te chuan hamthatna chi hrang hrang an hmu zel a, an la hmu zel dawn bawk a ni tiin, SHG motor ti a hriat lar Aajeevika Grameen Express Yojana (AGEY) kalpuitu SHG memberte chu theihtawp chhuah zel theuha, hamsawnna tluantling leh eizawnna ngelnghet siam kawnga tan la zel turin a fuih a. Kumin March thla a State level credit camp neih tuma Loan cheng vaibelchhe 2 chuang dawngtu SHG memberte theihtawp chhhuah chhunzawm zel turin a fuih a. CREDIT CAMP- Loan semchhuah pawh hmasawnna entirna pakhat a nih thu a tarlang a. SHG Loan la tur reng rengin dilna mumal tak an siam zel tawh vangin tunhma loan rulh that loh kha a awm tawh lo a, loan la te pawhin rinngam an nih zia pholanga a hun taka loan te vawm hlum thin tur leh tangkai taka loan hmang thiam turin a chah a. SHG ten awlsam taka loan an hmuh thehna kawnga thlawptu Bank lama thawktute chungah lawmthu a sawi bawk a. Rural Developmnet Deparment changtu Minister chuan kum 2018-19 FY chhunga MzSRLM hnuaia hmalakna leh hlawhthlinna hrang hrangte tarlanna Achievement Report tlangzarh ani thei leh MzSRLM hnuaia inziaklut District 5 atanga lokalkhawm Self Help Group ten an thlai thar chhuah leh siam chhuahtean han phochhuak thei chu lawmawm a tih thu a sawi a. SARAS Fair chu nakin zelah pawh huaihawt zel a that dawn thu sawiin, SARAS Fair a tel leh chhimtu zawng zawngte duhsakna hlan chungin he Fair hi Ribbon chepchatin a hawng a ni.
Pu Lalhmingthanga, IAS State Mission Director, MzSRLM & Secretary and Commissioner RD Dept chuan miretheite chawikanna tur a duan National Rural Livelihoods Mission chu kum 2011 a din a nih thu leh NRLM hnuaiah State tinah SHG te enkawltu tur dinin, Mizoramah pawh Mizoram State Rural Livelihoods Mission (MzSRLM) chu kum 2013 khan din a ni, a ti a. MzSRLM hian tun dinhmunah Kolasib, Serchhip, Mamit, Lawngtlai, Champhai leh Saiha District-a Block tinah hma ala mek a, a tahtawla hma zauh chho zel niin, thla hmasa atang khan NERLP hnuaia enkawl Aizawl leh Lunglei District chu MzSRLM enkawl tura dah anih thu leh Kum 2022 ah chuan Mizoram chhunga District a khua zawng zawnga intin tuam chhuak turin ruahmanna siam a ni, a ti bawk. RD Commissioner and Secretary chuan Mahila Kisan Sashaktikaran Pariyojana (MKSP) kaltlangin SHG member kut hnathawktu ten an huan leh lo neih enkawl chungchangah an chhawr tangkai mek scheme te, SHG chhungkua ten sumdawnna lam a an chhawr tangkai tur Startup Village Entrepreneurship Programme (SVEP) pawh Serchhip leh Kolasib District-ah hmalak chhoh mek a ni, a ti a. PRI- CBO Convergence kaltlangin khawtlang hruaitu VC te leh SHG te thawhho dan tur ruahmanna pawh Serchhip district-ah enchhinna neih mek niin hma chak taka lak mek a ni a, kum lo kal zel tur ah heng project-te hi District dang leh Block dang khaw tina hmalak tura ruahman a ni, a ti bawk. Lo neia kut hnathawh lam mai bakah thalaite tan a kut themthiamna leh eizawnna ngelnghet pe thei turin DDU-GKY pawh kalpui mek a ni a, DDU-GKY hnuaiah hian zokhaw lama thalaite chu eizawnna tlaka an thiamna tah hriamsak leh hna hmuhsak thlengin hma lak tum anih thu a sawi a. MzSRLM hlawhtlinna tarlangin, nikum maia National Level Best SHG Award – VAU SHG Bilkhawthlir Block ten an lak leh kuminah Livelihood CRP- Pi C. Lalawmpuii chu India ram pum a CRP ti tha zinga thlan tel anih tarlangin, Mizoram chu Farm Livelihoods-ah India ram State ti tha te zingah thlan anih thu pawh a sawilang bawk a ni. Kalkhawm mipuite chu SARAS Fair chhawr tangkaia, Self Help Group hmasawnna chu chhungkua, khua leh ram pum hmasawnna a ni tih hre thara mahni hmazawn theuhah theihtawp chhuah turin a chah nghal bawk a ni.
Vawiin SARAS Fair hawnnaah hian Pi Ethel Rothangpuii, PD DRDA Champhaiin kalkhawmte lawmna thu sawiin, Pi H.Lalchhandami, CEO, MzSRLM in report a pe a. Self Help Group 148 te hnenah tanpuina loan cheng nuai 231 Bank Branch hrang hrang 9 te kaltlanga pekchhuah niin, an kutah Minister leh Commissioner ten an hlan a. Bank Branch 11 te hnenah MzSRLM an thawhpui that avang leh Selp Help Group hmalakna an thlawp tlat avanga lawmthu sawina certificate pek an ni a. Pu Zoremthara Ralte, SDO Sadar-in lawmthu sawiin hawnna hun a khar a ni.
Sales of Rural Artisans Society (SARAS) FAIR hi Ministry of Rural Development Govt. of India chuan India ram state tina SRLM te buatsaih turin a beisei a. SARAS Fair hi Mizoramah kum 2015 atang khan hman tan a ni a. Hemi ti hlawhtling tur hian Mizoram State Rural Livelihoods Mission pawhin Kumin 2019-20 FY chhung hian tum hnih nei turin ruahmana a siam a ni. Champhai bakah hian kumin December hian Aizawl a neih tura ruahman a ni bawk. He SARAS Fair in a tum chu thingtlang a Self Help Group memberte thil siamchhuah leh an thiamna te hmunpui zawka phochhuahna leh in zawrchhuahna hmun buatsaih sak te a ni.
Regional SARAS Fair Champhaia neih mekah hian Mizoram hmun hrang hrang atangin Self Help Group Member 100 an tel a, Stall 50 awmin, District 5 atanga RD Block 14 te an tel thei a ni. October Ni 29 atanga Novemnber Ni 8, 2019 thleng SHG te thil thar leh siam chhuah tha tak takte he hunah hian lei theih reng a ni.
Attachment
- Loading attachment...
