FCS&CA Minister leh Kolasib A/C bialtu MLA ni bawk Pu K.Lalrinliana chuan vawiin khan MPTA Kolasib Branch Diamond Jubilee lawmna a hmanpui.

Khuallian chuan Jubilee lungphun hawnna a neih zawha inkhawm buatsaih ah thu sawiin MPTA Kolasib branch in diamond Jubilee an thleng thei chu thinlung taka a lawmpui thu a tarlang a, hruaitu hmasa te leh hruaitu dinhmun chelh mektu te inpekna chu fakawm a tih thu a sawi.

Pu K.Lalrinliana chuan Jubilee thuchah ah ‘intodelhna’ a neih thu sawiin Pathianin Ram tha tak bakah sik leh sa nuam takin Mizoram chu mal a sawm a, chuti chungin ei leh barah Mizoram a intodelh lo em em chu veiawm a tih thu a sawi a. Ram leh Hnam intodelh ni turin zirtirtu te chuan kawng pawimawh takah ke an pen theih thu a tarlang a, leilung hausakna haichhuak zawng leh intodelhna lam hawia zirlai naupangte sukthlek her rem saka mi puitlinga chherchhuak turin zirtirtu kalkhawm te a chah a ni.

Minister chuan zirna chu awmze nei taka kalpui a pawimawh thu sawiin zirlaibu thiamna ringawt nilo mahni zirlai chu a taka nunpui turin ngaituahna sen a ngai ani tiin zirlai naupangte hnenah intodelhna chungchang chu uar taka zirtirna pe turin zirtirtu kalkhawm te a chah ani. He hunah hian Khuallian chuan MPTA Kolasib branch tanpuinan sumfai a hlan bawk a ni.

Khual Zahawm kolasib Bawrhsap Pu Zoengsanga chuan zirtirtu hna chu hna pawimawh tak leh hna zahawm anih thu sawiin zirlai naupangten mahni zirtirtu te nundan leh nunchang chu an thlir renga, zirtirtute nun an entawn thin avangin zirtirtu te chu nun uluk turin a chah a.

Naupangte thanlenna leh hmalan hun chu zirtirtu kutah thui tak a innghah thu a sawi a, mi puitlinga chherchhuah chu zirtirtu mawhphurna ani tiin zirlai naupangte enkawlna chungchangah theihtawp chhuah turin zirtirtu kalkhawm te a sawm bawk a ni.

MPTA Kolasib branch hi kum 1959 a din niin tun dinhmunah member 41 an awm meka, Kolasib Town area bakah khaw pawn ami te pawh member ah an inziak lut a.

Jubilee lawmna inkhawmah hian MPTA Kolasib Branch Souvenir chu Bawrhsap Pu Zoengsanga’n a tlangzarh a, lawmna inkhawm banah kalkhawm ten Jubilee ruai an theh nghal a ni.