Nimin khan Pu Lalsawta, Minister Education etc,.chuan Ramhlun South H/S Matric Pass te lawmpuina hun a hman pui. He lawmna programme, Pu C.Lalruata, Ex-MLA leh Managing Board Chairman ni bawk kaihhruai ah hian Education Minister chu khual lian niin zirlai pass chhuak ta te lawmpuina thilpek hlanna hun neih a ni.
Minister chuan Mizoram Zirna khawvel tan Sawrkar leh mithiam ten nasa tak a hma an lak thu leh amah ngei pawhin a phak tawk a tan a lak nasat thu a sawi a. Khawtlang hmangaihtuten zirna an veizia hmuhin sawrkar tan pawh tun mai a tihhlawhtlin theih loh thil te tihsak lo tiam mai a awl thin hle thu a sawi bawk. Zirna pawimawh zia sawiin, mihringte chu pianpui thiamna nei lo, zirna avang a Pathian thilsiam dangte aia chungnung mai kan ni a ti. Minister chuan sikul tha chu naupang thiambik te chauh admit a result tha nei ni lo, a tu a te pawh admit a naupang hlawhtling leh result tha nei thei sikul a nih zawk thu a sawi. Pu Sawta chuan Mizote chu Missionary te hnathawhrah telin India ram mai ni lo khawvel huap a zirna avanga hmel mawi kan ni a ti. Khuallian chuan Education (Zirna) chu Mizo te thangchhuahna leh kan rophumruk (resource) lian tak a nih avangin Sawrkar pawhin a ngai pawimawh mai ni lovin  Zirna atan bika kumin chhunga sum ruahman pawh cheng vaibelchhe  500 vel lai a nih thu a sawi. Mizoram hmasawn mek zelin a koh luh tur company-te hman leh chhawrtlak Skilled Man Power Resources (Hnathawtu thiambik neite) buatsaihna kawngah Education (Zirna) chu a pawimawh hle a ni a ti. Education Reform Commission report pawh kumin May thla chhung a zawh hman a beisei awm thu leh Mizoram Zirna khawvel hmabak eng tak awm mek chu a nghahhlelhawm tak zet thu a sawi tel bawk.

Ramhlun South H/S hi kum 1995 a din  April 2008 a Adhoc Grand in Aid status pek a ni.Tunah hian staff 9 awm in zirlai 90 chuang an nei a an result pawh a tha thin hle a ni. Pu Sawta chuan matric pass ta te a lawmpui thu a sawi rualin  sawrkar sikul zirtirtu te pawh neitu rilru pu a hnathawk turin a ngen a, zirtirtute chu mahni fate luhna tlak a sawrkar sikul thuam tha turin mipui ten an beisei a ni a ti.