2797/2026-2027

Aizawl, Khuangchawi thla ni 23, 2026: Education Minister Dr. Vanlalthlana chuan vawiin khan Mizoram Primary Teachers’ Association (MPTA) General Conference, Dawrpui Multipurpose Centre, Aizawl-a neih chu khuallian niin a hmanpui. School Edcuation Director Pi Angela Zothanpuii chu khual zahawm a ni.

Dr.Vanlalthlana chuan MPTA in harsatna an neih hrang hranga sorkar hmalaknate a sawi a, hmasawnna tur awmah te hmasawn tura tan la turin a fuih. “Tun dinhmunah Performance Grading Index (PGI) ah India ram pumah 31 kan ni mek a, kan hniamna langsar tak chu Learning Outcome a ni. Learning Outcome-a hma kan sawn theih nan hian Standardized Assessment for Elementary Schools (SAfES) buatsaih a ni a, neih chhoh zel pawh tum a ni. SAfES kaltlang hian zirlai ten by heart ringawt lova, an hriat thiamna atanga an chhan theih nan leh zawhna changkang leh tha zawk neih theih beisei a ni a, chu chu PGI tehfung pawimawh tak pakhat PARAKH atan pawh inbuaisaihna tha tak a ni nghal dawn a ni,” a ti.

Mizoram Teacher Eligibility Test (MTET) chungchang pawh sawiin, kum 2028 hma a kum 5 aia tam service la nei ten MTET an neih vek theih nan tunah hian MBSE in ruahmanna a siam mek a, in-service tana tehna pawh tih hniam tum a ni a, test pawh kum khatah vawi 2 buatsaih tum a nih thu a Minister chuan a sawi a. “Kan tlin vek theih dan kan ngaihtuah a ni,” a ti.

Zirna ngai pawimawh Chief Minister kan nei hi kan vannei hle a, zirtirtu 671 lak phalna Sorkarin min pe a, heta tang hian kum 2026 chhung hian primary zirtirtu, a nghetin mi 100 la turin buaipui chhoh mek a ni, a ti.

Text bu indaih lohna chungchang sawiin Minister chuan kumin atangin chinfel a ni a, nakum lama sem tur pawh buaipui chhoh a ni lehtawh a, a hun taka sem leh theih ngei tum a ni, a ti.

Pawl 5, primary section-a dah chungchang pawh ngaih tuah reng a ni, Dr Vanlalthlana chuan a ti a. A room tur lam tihfel hmasak a ngaih avangin tih puitlin mai theih a la ni lo a, a room siamna tur hi kawng hrang hrang atangin ngaihtuah reng a ni, tih sawiin, tunah hian school 100 chuang sak thatna tur tender tichhuah a ni a, Teacher Quarter pawh CM scheme atanga saktheih nan zawn a ni, a ti bawk.

Schoold Education Miniser chuan Central lam atanga zirlai piah lam activity tam lutuk pawh Ministry lamah sawi a ni a, kan lo tih ve ngailo ang chi te inhrilhhriat zel niin, a tlem chho zel niin a lang a ti a. School calendar thlak avangin harsat tenau deuh kan tawk ngeiin a rinawm a, mahse thil tha zawk nei tur chuan harsatna tawrh a ngai fo thin tiin tuar hram hram turin a fuih.

Director Pi Angela Zothanpuii pawhin thu sawiin MPTA te chu dawr nuam tak an nih thu leh India ram pum ang pawha PM POSHAN-a a ti tha pawl an nih theihna chhan chu zirtirtute thawhrah a nihthu a sawi a. Zirlai, a bik takin primary zirlai rualte ngaihsan leh entawn ber chu an zirtirtute an ni a, chuvangin ruihhlo, zuk leh hmuam leh nungchangah pawh zirlaite entawn tlaka nung turin a chah a, thlen chin atanga hmasawn zel turin a fuih a ni.

Pu Rosangzuala, President, MPTA pawhin hun khat naah thu a sawi a, hun hnihna ah Pu R.Zonunmawia Vice President in thu a sawibawk. General Conference-ah hian Resolution pahnih an pawm –

1. Hindi hi National language a nih ang a, Primary School atanganaupangten an zir theih nan sorkarah thlen ni rawh se.
2. Primary School zawng zawngah Computer Set kan neih vektheih nan sorkarah thlen ni rawh se.