3956/2022-2023

Aizawl, 23rd March, 2023 : Mizoram SSA Teachers’ Association (MSSTA) General Conference vawi 3-na chu vawiin nileng khan Chanmari YMA Hall, Aizawl-ah neih a ni a. School Education Minister Pu lalchhandama Ralte chuan he hun hi khuallian niin a hmanpui a, Pu C. Lalthanzira, Addl. SPD, Samagra Shiksha, Mizoram chu khualzahawm a ni.

MSSTA member kalkhawm hmaah thuchah sawiin khuallian Pu Lalchhandama Ralte chuan Mizoram sawrkarin MSSTA te hamthatna tur a ngai pawimawh a, School Education minister a nih hnuah pawh Samagra hnuaia zirtirtute hlawh tihpun sak an nih bakah medical allowance te, casual leave leh earned leave te siam sak an ni tawh tih sawiin, COVID-19 vanga sawrkarin sum lama harsatna nasa tak a tawh mek lai pawha anmahni ngaih pawimawh an nih thu sawiin, a changtu minister a nih angin Chief Minister Pu Zoramthanga leh a minister puite chungah lawmthu a sawi a ni.

Minister chuan tunhnaia Gauhati High Court, Aizawl Bench-in MSSTA member te Mizoram sawrkara School Education department hnuaia primary leh middle school-a zirtirtu post ruaka dahnghet tura thutlukna a siam chungchang sawilangin hun engemawchen tawh atangin SSA hnuaia thawktute a theih ang anga, a tahtawla dahngheh an nih theih nan hma an lo lak tawh thu a sawi a, sawrkarin recruitment thar a tih dawnin an tan reservation siam sak turte pawhin rawtna an lo siam tawh tih tarlangin, sawrkar pawhin an dinhmun te hriatsakin a ngai pawimawh a, vawi duai lo an sawiho tawh tih a sawi a. Department hrang hrangah CSS hnuaia thawk tam tak an awm a, anni pawh hian dahngheh an duh ve vek a, sawrkar an nawr ve vek avangin DP&AR pawhin a zavaia khaikhawma zirchiang tur committee a din a ni a ti a. He committee in rawtna a siam pawh cabinet meetingah ngaihtuah a nih tawh thu leh siam that tul awma hriat a nih vanga uluk zawka en tha leh tura thawn let a nih thu a sawi bawk a ni.

High Court thutlukna pawh sawrkarin a dawn veleh dan angin Law & Judicial lamah zirchiang tura pek a nih tur thu sawiin, chutihrualin anmahni lam pawhin uluk takin theihtawp chhuahin tan an la dawn tih a sawi a. Hun engemaw chen atang tawh department in hma a lo la reng tawh a, an tlanchhe dawn lo tih sawiin khuallian chuan MSSTA member te mai bakah Samagra Shiksha hnuaia thawk midang zawng zawng pawh an ngaihtuah tel tih a sawi a ni.

Mizoram SSA Teachers’ Association hi March ni 29, 2016 khan din niin SSA hnuaia primary school leh middle school zirtirtute telin tunah hian member 1203 (primary school teacher – 550, middle school teacher – 653) an awm mek a. Sub-headquarters 8 (Lunglei, Champhai, Kolasib, Mamit, Serchhip, Khawzawl, Hnahthial leh Saitual) an nei a ni.

MSSTA General Conference hi hun hnihah then niin chawhma hun hi Rokima Varte, President, MSSTA – Chairman in a kaihruai a, Lalhermawia Tochhawng, Vice President chuan inlawmna thu sawiin, H. Ramdinthara, General Secretary hnen atangin report ngaihthlak a ni a, an member thi mi 15 sunna hunh man niin (member thite hi cheng nuai 1 theuhin ral an ni) Lalnghakliana Sr. Vice President in lawmthu sawina in chawhma hun hi a khar a ni.

Chawhnu lamah rorel inkhawm neiin, hemi zawh hian Mizoram RMSA Employee Welfare Association (MIREWA) hruaitute kaihhruaina hnuaiah kum 2023 – 2025 chhunga an pawl hruaitu turte an thlang a ni.