3951/2022-2023

Aizawl, the 23rd March 2023: Governor Hari Babu Kambhampati china vawiin khan Raj Bhavan-ah Pu L. Hangsing, Principal Accountant General leh a thawhpuite a kawm a. He hunah hian State Finances Audit Report(SFAR) 2021-2022 chungchanga Governor in a hriat duh te inhrilhfiahna leh sawihona neih a ni. PAG hi Deputy AG Pi Elvina Lalmuanpuii Leivon leh Senior Official dang ten an tawiawm a ni.

Governor Hari Babu Kambhampati chuan PAG leh a thawhpui te chu SFAR 2021-22 an siam takah a hriatchian duh lai te uluk taka zawtin a sawipui a. Audit lam thlirna atanga Mizoram Sawrkar dinhmun diktak leh hmabak te pawh Governor chuan PAG leh a thawhpui te hi a zawt chiang a. Public Account Committee (PAC) leh PAG office thawhhona chungchang pawh a zawt bawk a ni.

SFAR 2021-2022 hi Assembly-ah pharh leh tur a ni a, hemi hnu hian PAC in an sawiho leh dawn a ni. SFAR hi Audit ten India Danpui hnuaia Article 151 behchhan a, kum khat chhunga State sum dinhmun - lakluh, thawhchhuah leh hmanna bakah hman dan zirchianna kimchang, a buatsaih a ni.

SFAR in a tum ber chu sum leh pai state dinhmun dik tak tarlan, kum tam tak chhung atana state sum leh pai uluk taka vawn dan inkawhhmuhna, state sum thawh chhuah, lakluh leh hman dan te dan ang thlapin zawm a ni em ti enfiah, account leh finance report dik tak a awm theih na tura  sawrkar tanpui leh tihdan dik kawhhmuh te a ni.