3957/2022-2023

Vau thla ni 23, 2023: March ni 21, 2023 (Thawhlehni) zan atanga tan, Siaha District-a Tipa 'V' (Tuipang 'V')-a Chhimtuipui Group Young Mizo Association (YMA) Inkhawmpui vawi 37-na hman mek chu vawiin a tiak ni khan Mizoram Sawrkara Rural Development Minister Pu Lalruatkima chuan Khuallian niin a hmanpui.

Tipa 'V' YMA Hall-a Inkhawmpui buatsaihah I&PR Minister Pu Lalruatkima chuan Chhimtuipui Group YMA Inkhawmpui chhimtu zawng zawngte chibai bukin, duhsakna a hlan a. YMA chu Pathian rawngbawltu missionary-te kal tlanga din, tanpui ngaite tanpuitu leh khawtlang nunphung ?ha vawng nungtu a ni tiin, YMA din chhan leh thil tum tihlawhtling a, YMA chu thianghlim taka chawi nung zel turin member kal khawmte chu a chah a. Zo hnahthlak hnam hrang hrangin mahni puala tlawmngai pawl kan neihte inpumkhat a, ram leh hnam hmasawn nan tum thuhmun neia mahni zawnah theih tawp chhuah tlan a tul tih a sawi. Ramin ri nei mah se, ramriin hnam a then thei lo va, hnam inpumkhatna a tichhe thei lo tih sawiin, Zo hnahthlakte chu ram inrelbawlnaah khawvel ramriin min daidang mah se, ram danga kan unaute nen chhiat thatah inngaihven a, inunauna kan lantir zel hi a lawmawm hle a ni, a ti a. Tun hnaia Myanmar leh Bangladesh atanga ram chhung buaina avanga sahimna zawnga Mizorama lo tlan lut Zo hnahthlak unaute tlawmngai pawl hrang hrangin an lo kuah khawm dan leh sawrkar pawhin a theih ang anga a lo tuamhlawm danah hei hi chiang takin a lang a ni, a ti.

Khuallian Pu Lalruatkima chuan Group YMA Inkhawmpui thupui “Ram leh hnam humhalh” chu thupui pawimawh tak, ngaihthah thiang lo a nih thu sawiin, ram leh hnam humhalh turin zirna uar, ruihhlo laka inthiar fihlim leh fa hrin tam te chu hma lakna tur pawimawh tak a ni, a ti a. YMA member mipate chu pasal tlak leh chhungkaw enkawl tlak nih tum tur leh nulate pawh Zo hnahthlak fa chauh hrin tum tura fuihin, chu chu ram leh hnam humhalhna kawng pawimawh tak a ni, a ti a. Mizote chu hnam tlawmngai, hnam taima, hnam rinawm leh hnam huaisen kan nih angin, Inkhawmpui palaite chu chu nihnaa chianna chu hawnpui a, an ni tin nunah a taka nunpui turin a chah a ni.

Pu Lalruatkima hian Chhimtuipui Group YMA kutah leh Inkhawmpui dawltu Tipa 'V' Branch kutah tanpuina sumfai a hlan a. Tipa 'V' YMA Hall sak chhunzawmna an dil chu ngaihtuahpui a tum thu a sawi bawk.

Vawiin chawhma lama vantlang inkhawm hi Chhimtuipui Group YMA President Prof. Chawngkhuma Chawngthu chuan a kaihruai a. Tipa 'V' Branch atangin Lt. Lalrohawnga, The Salvation Army chuan hunserh a hmang a. Mara Thyutlia Py (MTP), General Headquarters ai awhin Tipa Sub-Headquarters President Pu C. Vabeirathi, Lunglei Sub-Headquarters YMA ai awhin Vice President Pu K. Lalfakzuala leh CYMA ai awhin CEC Member Pu K. Darthantluanga te hnen atangin chibai bukna leh fuihna thuchah ngaihthlak a ni a. T. Laldinthara, Siaha Bazar Branch; C. Lalthangmawia, Kaochao 'E' Branch leh Abida, Tipa 'V' te hnen atangin malzai ngaihthlak niin, D. Trix (Siaha Bazar Branch) leh Meisatla Branch te'n group dance leh hnam lam an entir bawk.

Chhimtuipui Group YMA Inkhawmpui hi March ni 21, 2023 (Thawhlehni) zan khan palai lawmna inkhawm buatsaihin tan a ni a. Nimin khan zingkarah volleyball tournament, chhun lamah rorel inkhawm, chawhnuah Lengkhawm Zai Intihsiak leh Hnam Lam Entir hun leh zan lamah vantlang inkhawm te buatsaih a ni a. Tukin zingkar khan khaw chhung then fai hnatlang thawh niin, chawhma lama vantlang inkhawm neih bakah, chawhnuah Group YMA Hruaitu Inthlanna buatsaih a ni a. Zanin hian vantlang inkhawm buatsaih leh niin, Inkhawmpui hi a tiak ang.

YMA Chhimtuipui Group hi kum 1984 khan YMA Sub-Headquarters, Lunglei hnuaiah Group No. VII hming chawiin din a ni a, a hnuah Saiha Group YMA tia hming thlak leh niin, chumi hnuah Chhimtuipui Group tia a hming thlak a ni leh ta a ni. Tun dinhmunah Chhimtuipui Group YMA hnuaiah hian branch 14 ding mekin, member 1,300 vel an awm mek a. He Inkhawmpuiah hian thupui atan “Ram leh hnam humhalh” tih chu hman niin, Inkhawmpui chhimtu khualkhua atanga mikhual riak lut mi 260 vel bakah, tualchhung atang leh lehlanga chhimtu eng emaw zat an awm a ni.

RD Minister hian Chhimtuipui Group YMA Inkhawmpui hun a hmanpui zawh hian Tipa BDO office building thar sak mek chu a hmunah tlawhin, hna thawh dinhmun a enfiah nghal a. Tlai lamah Lunglei lam panin Tipa hi a chhuahsan leh nghal a ni.