Mizo Students’ Union, Shillong 38^th Annual Freshers’ Day chu vawiin khan Shillong-a U So So Tham Auditorium-ah neih a ni a, School Education leh Trade & Commerce Minister Pu H. Rohluna’n khuallian niin a hmanpui.

Khuallian Pu H. Rohluna chuan MSU Shillong Annual Freshers’ Day hmang tura lo kal zirlaite chu Shillong-a an chhungten an dah chhan hre reng turin a chah a, khaw kilkhawr zawka awm zirlaite chuan awtru takin an thlir che u a, chuvangin thahnemngai taka zir turin a fuih. All India Level intihsiaknaah tunhnai chhovah Mizo hming a lang tlem a, zirna in thaah Mizo hming a lang tlem tawh hle bawk a, rualawh a na a, zirlaiten tanlak a ngai hle a ni, a ti. Social Media lar chho zel hian zirna hun tam tak a la a, lehkhabu tha chhiarna hun tam tak a la hek a, chu chuan kan society a hruai sual mek a, zirlaiten kawng dik an zawh leh vat a ngai a ni, a ti bawk. Shillong-a zirlaite chu midangte belh tlak leh chhawr tlak thiamna nei turin a chah a, ram leh hnam leh chhungkaw tana mi chuanawm ni turin zirlaite a chah.

MSU Shillong Freshers’ Day-a khualzahawm Pu R.K.Lianzuala pawhin  zirlaite fuihna thu a sawi a, zirlaite chu tun atanga kum 10 hmang tha hram hram turin a fuih a, zirlai nih laia nun khawlo laklawh tawhte chu nun pangngaia let a awlai lo tih sawiin thil tha lo laka insum tlat turin a fuih a. Zoram pawna awm an nih avangin lunglen te, ho taka awmte leh mahni inkhawngaihna nei lova chhel taka awm turin a fuih. Zirlaite chu kawng kal neia lehkha zir turin a chah bawk a, chumi a nih loh chuan degree sang tak nei, thawh tur nei leh si lo an ni ang tih a hlauhthawn thu a sawi bawk.

He 38^th Annual Freshers’ Day ah hian MSU, Shillong hruaitute leh Adviser te bakah Shillong khawpui chhunga College 16 atangin Mizo zirlai thahnem tak an kalkhawm a ni.