Vawiin hian Serchhip DC Conference hall ah Bawrhsap Pi Sangchhin Chinzah hmalakna leh kaihhruaiin Serchhip khawpui chhunga Officers te, Village Council tin aiawh, tlawmngai pawl leh khawtlang hruaitute, Sub-Headquarters leh District huap tlawmngai pawl hruaitute leh chanchinbu miten Serchhip khawpui fai zawka enkawl dan leh hmalak dan tur hrang hrang inrawn khawmna an nei.

He hun kaihruaitu Pi Sangchhin Chinzah chuan, Urban Development & Poverty Alleviation Department buatsaiha District khawpui tan faina lama intihsiakna leh khawpui dangte tana intihsiaknate buatsaih anih thu sawiin, chu intihsiaknaa dinhmun tha taka Serchhip a din theih nana ruahmanna neih puiah kalkhawmte a sawm a. District Capital fai ber kan nih theihna atana hmalakna tur pawimawh leh inbuatsaihna tur chi tinrengah kalkhawmte chu ngaihdan nei pha chin annih beisei vanga sawm khawm an nih thu hrilhin, hmalakna tur chhawpchhuah zawng zawngte a taka puitlin ngei tura thawhpuiah Serchhip mipuite a sawm nghal a. Ram lailia awm kan nih avangin kawng engkima entawn tlak nih kan tum tur a ni, a ti. Pi Sangchhin Chinzah chuan, intihsiakna lawmman dawn ngawr ngawr aia fai vanga mihringin lawmman hlu chi tinreng a hmuh theihte rilrua dah lian chunga ruahmanna te nei turin kalkhawmte  sawm a ni.

Vawiina kal khawmte hian UD&PA in khawpui fai a tehna tur chi hrang hrangte sawi zuina leh hmalak dan tur rawtnate an siam a, heng ruahmanna hrang hrang an chhawpchhuahte hi a theih chin chinah hmalak zui nghal tur a ni bawk ang.

Urban Development & Poverty Alleviation Department hian District Capital faina lama intihsiakna atan hian tehna pawimawh chi 6 (ruk) a siam a. Chungte chu: Open Defecation Free (ODF) Mark 30, Bawlhhlawh sawngbawl dan (Solid Waste management) Mark 20, Information, Education & Communication (IEC) Mark 10, Mipui tha thawh (Community Participation) Mark 15, Tui chhe luankawr (side drain) Mark 15 leh Mipuite lungawina (Public Feedback) Mark 10 pute an ni a, heng point hrang hrangte khian chipchiar lehzuala intihsiakna kalphung dang an la nei leh hlawm bawk.  He intihsiakna endik hna hi September ni 1 atanga ni 20 inkarah hian Evaluation Team ten an nei kual dawn a ni.

District Capital fai intihsiaknaah hian pakhatna in Rs. 100000 (nuai khat), pahnihna in Rs. 50000 (singnga) leh pathumna in Rs. 30000 (sing thum) leh Citation te an keng tel ang.