Vawiin chawhma dar 10:30 khan Serchhip DC Conference Hall ah Mizoram sawrkarin zirna kalphung thar kalpui tura ruahmanna a siam chungchang ah “Education Awareness Campaign” neih a ni a, Education Minister Pu Lalsawta’n khuallian niin a hmanpui a, Serchhip Town area huamchhunga Zirna In hrang hranga thawktu Teaching staff leh Non-Teaching staff bakah Education Department hnuaia sawrkar pisa hrang hranga thawktute an tel kim hle a ni.
Minister chuan kalkhawmte chu Mizorama zirna kalphung thar kalpui tum anih chhan sawifiahin thangtharte hi khawvel cho thei tur khawpa thiamna pek tumin hma an la a ni a ti a, an lehkhazir awmzia hrethiam miah lova by-heart thin hi zirlaite tan a pawi em avangin he kalphung thar hi tihdanglam a ngai ani a ti a, an thil zirte an thluaka cham tir reng thei tura siam turin ngaihtuahna sen a tul a ni a ti bawk.
Naupangte rilru ah zir chakna thinlung tuh thei tura zirna kalpui a ngaih thu sawiin Minister chuan zirtirtute chu naupangte exam leh test question siamin an thiamloh kilkhawr leh har tak tak ringawt zawng lova, an thiam chian tur leh an tana tangkai thei tur ni bawk zawhna siam a, mark pawh ren lo mai turin a chah a, chu chuan zirlaite a cho phur zawka a rin thu leh zir belh zel a hriat belh zel chakna a pek a rin thu a sawi bawk. Mizoram Sawrkar sum dinhmun harsat avanga duh anga infrastructure development kalpui harsa chu hrehawm a tih thu sawilangin Pu sawta chuan hetiang dinhmuna ding hi ni mah ila zirtirtute an hna a an tui phawt chuan an hlawhchham dawn chuanglo a ni a ti a, Serchhip Sub-Headquarters YMA te nen zirna siamthat chungchang an sawiho avanga a lawmthu sawiin tlawmngai pawl ten an tui pui avanga amah pawhin beiseina a neihsan thu a sawi a, he kalphung thar hlawhtlin theih nana theihtawp chhuahpuiah kalkhawmte chu a sawm nghal bawk a ni.
Education Awareness Campaign hi SSA Mission, Serchhip District leh School Education Department, Serchhip District tangkawp te buatsaih niin he inkhawm hi District Bawrhsap Pu P.Lalchhuanga’n a kaihruai a ni.
Minister hian vawiin chawhnu lam khan Serchhip a School Education Department pisa hrang hrang a tlawh kual bakah District Resource Centre (DIET) pawh ahmunah kalin a tlawh bawk a ni.
