Nimin chawhnu dar 2 khan NLUP Implementing Board Chairman Pu R. Selthuama hovin a office-ah Lines Department hotute leh NIB Officials te an thu khawm a, NLUP hmalakna an thlirho.

Pu R. Selthuama chuan, Local Council/Village Council Election avangin NLUP Beneficiaries te hnenah an sum dawn tur duh anga hma a pek a nih theih loh avangin pawi a tih thu a sawi a, tun dinhhmunah chuan Lines Department ten a rang thei ang berin verification an neih zawh tawh te hnenah installment an dawn turte sem thuai thuai turin a hrilh a ni.

Agriculture, Fisheries, Horticulture, Soil & Water Conservation hnuai a trade thlangte phei chuan tun thal lai hian hna an thawh zung zung theihna turin Lines Department te chu tan la turin hriattir an ni a, hemi atana pawisa draw theih turin Finance Department lam pawhin hmanhmawh thlak a nih avangin lo hrethiam tura an ngaih thu an sawi a, March thla chhung ngeiin sem zawh nise, an ti.

Horticulture bik ah chuan April 20, 2012 chhung ngeiin an Beneficiaries te installment pe tlak se tih an rel a, Industry Department hnuaia khawl hmu turte tana chah mek chu nawr ran dan ngaihtuah a ni a, AH & Vety Department bawng tha chi chah chu vawi khatah a tam thama rawn thawn theih a nih loh avangin Beneficiaries ten an hmuh ran nan an company zuk biak tawh Haryana a mi pakhat bakah state dang bawng tha lak nise tih an rel bawk.

Line Department te chu Plan Discussion, Planning Commission a neih hma ngei a report felfai buatsaih turin leh inpeih hman tura tan la turin Pu P.L. Thanga, Vice Chairman, NIB chuan a chah a, an Utilisation certificate fel tak an mamawh thu a hrilh bawk.