Aizawl West College leh Mizoram Information Commission tangrualte chuan vawiin khan Aizawl West College, Top Floor ah Educational Talk on RTI Act, 2015 Pu Lal Dingliana, IFS (Rtd.) Chief Information Commissioner hovin an hmang.
Aizawl West College in Public Administration Department Course ah RTI hi subject pakhatah an hmang tih a hriat avanga lawmthu sawiin khuallian Pu Lal Dingliana chuan he an zirlai hi zirlaite leh zirlai hruaitute bakah khawtlang tan pawh tangkai tak anih a beisei thu leh a bulthut atanga ram leh khawtlang tana hmalak a pawimawh thu a sawi. Mipuiten India ramah RTI Dan an hlut leh ngaihven hle tih sawiin 12th October, 2005 a hman tan a nih atangin RTI hmanga zawhna a tam thu leh kum khatah RTI Application nuai 45 atanga 50 vel a lut thin in, Mizoramah chuan RTI Dan hman tan anih atanga vawiin ni thlengin mipui hnen atangin Information dilna (application ) sang riat vel lai Sorkar Office (public authorities) hrang hrangin an dawng tawh tiin hei hian RTI Dan hnuaia mipui ten an chanvo pawimawh tak an ti mek tih a lantir a. RTI Act avangin sorkar leh sorkar hnathawk te an fimkhur tawn avangin corruption venna kawngah pawh a pawimawh hle a ni a ti.
Pu Lal Dingliana chuan Mizoram mipuite hnena RTI Dan hrilhfiah (awareness) a la tul hle tiin Sorkar, NGO leh mipuite nena tan ho a theihtawp chhuah zel a tul thu leh chumi atana hma an lak reng thu te vawiina GAWC te nena an thawhho ang chu tih zel tha a tih thu a sawi a. Kan ramah langtlang sorkar, sorkar dik leh rintlak a awm theih nan te, corruption do leh ven nan te RTI Dan chu hrechianga hmang tam deuh deuh turin zirlaite chu a sawm a ni.
Pu T. Lalfakzuala, Vice President, SU in a kaihhruai vawiin programme ah hian Govt. Aizawl West College Principal Dr. Laithanzauva pawhin a tangkai zawnga RTI Act chu hmang tura zirlaite fuihin a pawimawhna leh a tum te hrefiah thiam turin chah a. An College chu account vawn kawngah te, register vawn danah te langtlang (transparency) a an kal thu leh miin an College inrelbawl danah te hriat duh an neih chuan zawh theih reng an nih thu a sawi.
Kumtin 5th – 12th October inkarah hian RTI Week hman thin a ni a. Kuminah pawh a vawi 5 na atan RTI Week hi 5th – 12th October, 2015 ah hman a ni leh dawn a ni.
