Mizo Academy of Letters(MAL) Jt Hqrs, Lunglei-in Mizo tawng thu leh hla lama thawhhlawk mi thlan bikte hnena kum 5 dana a pek thin ‘Pu Buanga Award’ chu vawiin khan YMA Sub Hqrs Conference Hall, Lunglei-ah hlanna inkhawm neih a ni. Khuallian Environment & Forests Minister Pu Lalrinmawia Ralte chuan kumin ‘Pu Buanga Award 2015’ dawngtu Padma Shree Pu Lalthangfala Sailo hnenah he Award hi a hlan a ni.

‘Pu Buanga Award’ hlanna inkhawm MAL Jt Hqrs President Pu C.Hrangdula kaihhruaiah Pu Lalrinmawia Ralte chuan thu leh hla lama mithiamte hi hnam rohlu dik tak an ni a ti a, Mizoten chawimawi phu tak tak te chawimawina chang kan hre chho zel hi a lawmawm takzet a ni, a ti a. Thu leh hlain mihringte a awm tleiin kan rilru pawh thui takin a kaihruai thin a, chuvangin thu leh hla reng rengte chu ziaka dah that a pawimawh a, Mizo tawng vawnhimna pawh a ni bawk, a ti. Mizo hnam phuarkhawmtu awmchhun chu kan thu leh hla te a ni a, kan mimal thlarau nun leh kohhran nun chawmtu ber a ni tiin Khuallian chuan Pu Buanga Award dawngtu Pu Lalthangfala Sailo chu Mizote tan rohlu a tling zet a ni tiin duhsakna a hlan a ni.

Award dawngtu Pu Lalthangfala Sailo pawhin MAL Jt. Hqrs chungah lawmthu sawiin hmarchhak bial chhunga hnam tawng chi hrang hrang zingah Mizo tawng pawh ral mai thei dinhmun hlauhawm a chang mek thu a sawi a; Mizo tawng vawnhim nana ram Danpui Eight Schedule-ah khung luh a tul tak zet a ni, a ti.

Mizo Academy of Letters(MAL) Jt Hqrs, Lunglei-in a pek thin ‘Pu Buanga Award’ hi a hmain thu leh hla lama mithiam 3 hnenah hlan a ni tawh a, chungte chu - Kum 2000-ah Pi Lalsangzuali Sailo; kum 2005-ah Pu B.Lalthangliana leh kum 2010-ah Prof.Laltluangliana Khiangte te an ni a. Tun hnaia Mizo Academy of Letters(MAL) Jt Hqrs, Lunglei Executive Committee thukhawm chuan he Award hi kum 3 danah pek tawh turin a rel nghe nghe a ni.