Mizoram Sorkar-a Disaster Management & Rehabilitation Department-in Tuipui ‘D’ a dah tur chhiatrupna a lo thlen thulha hman atan Inflatable Rubber Boat 1 leh Life Jacket 6 chu vawiin khan Pu Rothuama MCS, Addl. DC leh Lunglei District Management Authority Chief Executive Officer ni bawk chuan Tuipui ‘D’ Village Disaster Management Committee kutah a hlan.

Heng Disaster Management hmanrua hlanna inkhawm Tuipui ‘D’ VCP kaihhruaiah Pu Rothuama, Addl. DC chuan Tuipui D leh a chhehvel khua ten tangkai taka hmang tur leh dimdawi taka enkawl turin a chah a, chhiatrupna leh a kaihhnawih thil ni lo thil danga hman dawn chuan Lunglei DC hnenah phalna lak hmasak a ngaih thu a hrilh a. Chu bakah chhiatrupna a lo thlen hian mahni bialtu SDO, BDO leh Zonal Officer te a rang thei ang bera an chhiattawh chungchang hriattir turin a hrilh bawk a ni.

Lunglei District DM&R Organiser Pu Lungduhsanga pawhin chhiattawha chhanchhuahna hmanrua hmandan tur leh enkawl dan tur kaihhruainate tarlangin Village Disaster Management Committee nihphung leh Village Disaster Management Plan siamdan tur a hrilhfiah bawk a ni.