Vawiin khan SAI Extension Centre, Electric Veng, Lunglei-ah Sports discipline 13-a infiammi titha mi 177 hnenah 4th HPC Sport Incentive Cash Award sem a ni a. He Cash Award a zavaia Rs.1,89,000/- tling chu Pu Zothanmawia, Director, Sport & Youth Service Deptt. in a hlan.

HPC Sports Incentive Cash Award semna inkhawm LDSC Chairman Pu K.Lalawmpuia kaihhruaiah Pu Zothanmawia chuan Cash Award an pek thin avangin HPC chungah lawmthu sawiin Cash Award siam hian infiammite inrintawkna leh phurna a siam thin a ni, a ti. Sport-a hlawhtling tur chuan harsatna tam tak paltlang a ngai a, thuawihna te, Coach te zirtirna zawm that te leh Academy-ah mumal taka zir hian hlawhtlinna a thlen thin a ni tiin District Level chauh ni lovin State, National leh International thlengin tumruhna leh taimakna hian a hlangkai thei a ni tiin a fuih bawk. Lehkhazir pahin sport hi a tih theih a, chu chuan nakin zelah pawh an hlawhtlinna kawngah thui takin a pui thei a, Hindi leh English tawng hi infiammite tan thiam a pawimawh hle thu a sawi.

Pu J.Vansangzuala, DS&YO chuan report pein infiammite hmasawn theih nan kum 2012 atangin HPC-in sum a thehchhuak a, kum 2012-ah infiammi 17 hnenah Rs.50,000; kum 2013-ah infiammi 44 te hnenah Rs.50,000 leh kum 2014-ah infiammi 155 te hnenah Rs.1,00,000/- pek an ni tawh a ni tih a tarlang. He hunah hian Pu F.Lalzarmawia, District Research Officer, HPC Office in lawmthu sawiin hun a khar a ni.